महिंद्रा जावा ३०० होणार बाजारात दाखल

0

नाशिक : भारतात ९० च्या दशकात कित्येकांच्या मनावर अधिराज्य गाजवणारी जावा मोटारसायकल पुन्हा एकदा दाखल होण्यास सज्ज झाली आहे. महिंद्रा अँड महिंद्राच्या अंतर्गत क्लासिक लीजंड्स हि कंपनी जावा या मोटरसायकलला लाँच करणार आहेत.

क्लासिक लिजेंड या कामापनीला २०१६ मध्ये महिंद्राने खरेदी केले होते. त्यामुले आता पुन्हा एकदा आकर्षणाचा विषय राहिलेली jawa ३०० ला भारतामध्ये लाँच करण्याची घोषणा महिंद्राने केली आहे. Jawa Motorcycles ला महिंद्रा अँड महिंद्रा १५ तारखेला लाँच करणार आहे.

अद्याप या बाईकची किंमत समोर आलेली नसून अंदाजे दोन लाखांच्या आसपास या बाईकची किंमत असू शकते. Jawa Motorcycles चा व्हिडीओ सोशल मीडियावर पोस्ट करण्यात आला आहे. त्यामुळे सध्या हा चर्चेचा विषय आहे.

देवळा तालुक्यात मका पीकाची ऑनलाईन नोंदणीचा शुभारंभ

0

भऊर (वार्ताहर) : देवळा येथे शासकीय आधारभूत किंमत १७०० रुपये प्रति क्विंटल दराने मका खरेदीसाठी ऑनलाईन बुकिंगचा शुभारंभ शेतकी संघाचे अध्यक्ष चिंतामण आहेर यांच्या हस्ते करण्यात आला. विठेवाडी येथील बाळासाहेब गमण निकम हया शेतकऱ्याच्या मका पीकाची ऑनलाईन नोंदणी करून योजनेचा शुभारंभ करण्यात आला. आतापर्यंत २६८ शेतकऱ्यांनी मका पीकाची ऑनलाईन नोंदणी केली असल्याची माहिती व्यवस्थापक गोरख आहेर यांनी दिली आहे.

शेतकरी संघाच्या कार्यालयात झालेल्या ह्या कार्यक्रमासाठी देवळा तालुका शेतकरी सहकारी खरेदी विक्री संघाचे अध्यक्ष चिंतामण आहेर, सहायक निबंधक संजय गीते, जिल्हा मार्केटिंग अधिकारी विवेक इंगळे, योगेश आहेर, सचिव दौलतराव शिंदे आदी उपस्थित होते.

जिल्हा मार्केटींग फेडरेशनच्या माध्यमातून देवळा तालुका शेतकरी संघाची उप अभिकर्ता म्हणून नियुक्ती करण्यात आली आहे. सन २०१८ / १९ खरीप पणन हंगाम आधारभूत किंमत खरेदी योजनेतर्गत प्रति क्विंटल १७०० रुपये दराने शेतकरी संघामार्फत मका खरेदी केला जाणार आहे. यासाठी शेतकऱ्यांनी चांगल्या प्रतिचा स्वच्छ व कोरडा केलेला मका आणावयाचा आहे. हया मक्याची आर्द्ता १४ टके विहीत करण्यात आलेली आहे. ऑनलाईन बुकिंग करण्यासाठी शेतकऱ्यांनी मका पीकाची नोंद असलेला सातबारा उतारा, आधार क्रमांक, बँक पासबुक झेरॉक्स, मोबाईल क्र, इत्यादी शेतकरी संघाच्या कार्यालयात जमा करून नोंदणी करून घ्यावी व योजनेचा लाभ घ्यावा असे आवाहन शेतकरी संघाचे अध्यक्ष चिंतामण आहेर यांनी केले आहे.

यावेळी शेतकरी संघाचे उपाध्यक्ष संजय गायकवाड, अतुल आहेर, अमोल आहेर, बापू आहेर, महेंद्र आहेर,डॉ. राजेंद्र ब्राम्हणकर, साहेबराव सोनजे, सुनिल देवरे आदी संचालक व शेतकरी उपस्थित होते.

आ.एकनाथराव खडसे यांना बंधू शोक

0

मुक्ताईनगर| दि. 14  वार्ताहर :  कोथळी ता मुक्ताईनगर जि जळगाव येथील विश्वनाथ गणपतराव खडसे (वय 75) यांचे आज 14 नोव्हेंबर रोजी सकाळी 7.30 वा . वृद्धापकाळाने निधन झाले . 

स्व.विश्वनाथ खडसे यांचे शिक्षण मराठवाडा विद्यापीठातून 1968 साली Msc केमिस्ट्री मधून पूर्ण करून ते विद्यापीठातून पहिले गोल्ड मेडॅलिस्ट होते.त्यानंतर त्यांनी सिबागाई(बिनाका) मुंबई या विदेशी कंपनीत  वरिष्ठ
शास्त्रज्ञ म्हणून काम पाहिले.

त्यांच्या  पश्चात चार भाऊ,एक बहीण,पत्नी,दोन मुलं,सुना,नातवंडे असा परिवार आहे.  ते आ. एकनाथराव खडसे यांचे वडील बंधू तर सचिन व निर्मल खडसे यांचे वडील होत.

परदेशवारीला जाताय? मग या सर्वात स्वस्त देशात जा…

0

परदेशात फिरण्याचे प्रत्येकाचेच स्वप्न असते. अनेक देशांच्या तुलनेत भारताचा रुपया खूप हलका आहे त्यामुळे बड्या देशात फिरायला जाण्यासाठी खिसा जास्तीचा हलका होईल यामुळे पुढे येत नाही.

पण जगात असे काही देश आहेत तेथे फिरायला गेल्यावर तुमचा खिसा जास्त हलका होणार नाही. तसेच तुम्हाला राहण्याखाण्यापासून नवनवीन गोष्टीही याठिकाणी उपलब्ध होतील.

मग जगातील हे स्वस्त देश कोणते जाणून घेऊया.

थायलंड

बीच आणि पार्टीसाठी कोणता देश प्रसिद्ध आहे असे जर कुणी विचारले तर पटकन थायलंडचे नाव समोर येते. येथे तुम्हाला अवघ्या २५० रुपयांपर्यंत रुम मिळू शकते. तसेच २०० रुपयांत जेवण मिळू शकते. थायलंड हा सुट्ट्या घालविण्यासाठी चांगला पर्याय असल्याचे सांगितले जाते.

नेपाळ

नेपाळ नैसर्गिक सुंदरतेसाठी प्रसिद्ध आहे. इथे तुम्ही ६०० रुपयांती तीन वेळा जेवणाची मजा घेऊ शकता. तसेच २७० रुपयांत तुम्ही रुमही बुक करु शकता. भारताला लागुनच असलेला देश नेपाळ हा एक चांगला पर्याय आहे.

व्हिएतनाम

स्वस्त जेवण आणि भरपूर शॉपिंगसाठी तुम्ही या देशाची निवड करु शकता. इथे व्हिएतनामी डिशची मजा केवळ ६६ रुपयांपर्यंत घेता येते. तसेच २०० रुपयांपर्यंत रुम बुक करण्याची सुविधा आहे. त्यामुळे परदेशवारीसाठी हा एक चांगला पर्याय असेल.

चीन

चीनमध्ये फिरण्यासाठी तुम्हाला तुमचे बजेट वाढवावे लागणार नाही. एका ठिकाणाहून दुसऱ्या ठिकाणी जाण्याचा खर्च चीनमध्ये केवळ ६६ रुपये इतका होतो. चीनमध्ये अनेक निसर्गरम्य ठिकानं आहेत. कमी खर्चात तुमची सफर होऊ शकते.

इंडोनेशिया

नॅचरल ब्युटीची मजा घ्यायची असल्यास इंडोनेशियाला नक्की भेट द्यावी. टुरीस्ट इंडोनेशियात केवळ ६७ रुपयांत डिनर करु शकता. तसेच २५० रुपयांत हॉटेल बुक करु शकता. भारतापासून अगदी जवळ हा देश असून चेन्नईवरून इथे जाण्यासाठी अधिक सोयीस्कर असल्यामुळे इथून जास्त पर्यटक इंडोनेशियाकडे रवाना होतात.

बुल्गारिया

बुल्गारिया ईस्टर्न युरोपमध्ये आहे. युरोप, साऊथ-ईस्ट एशिया आणि अमेरिकेपेक्षाही महाग आहे. मात्र बुल्गारियमध्ये खाण्यापिण्यासाठी तसेच राहण्यासाठी जास्त खर्च होत नाही. तेथे १ लीटर बियर १३० रुपयांत मिळते. येथे तुम्ही ६०० रुपयांत रुम बुक करु शकता.

कंबोडिया

कंबोडियामध्ये खाण्यापिण्यासाठी तसेच राहण्यासाठी जास्त खर्च होत नाही. येथे हॉटेलमध्ये तुम्ही २५० रुपयांपर्यंत जेवण जेवू शकता. त्यामुळे कंबोडियासुध्दा आपल्याला फिरायला एक चांगले ठिकाण आहे.

पेरु

जगातील कुल आणि मॅजिकल ठिकाण म्हणजे पेरु. येथे तुम्ही ५०० रुपयांत रुम बुक करु शकता. ३५० रुपयांत तुम्हाला जेवण मिळते.

छत्तीसगड : नक्षलवाद्यांनी सुरक्षा दलाच्या जवानांवर हल्ला

0
छत्तीसगड :  छत्तीसगडमध्ये आज पुन्हा एकदा नक्षलवाद्यांनी सुरक्षा दलाच्या जवानांवर हल्ला केला. नक्षलवाद्यांनी सुरक्षा दलातील जवानांच्या बसवर चौफेर गोळीबार करत आयईडी स्फोट घडवून आणला. त्यात ५ जवानांसह सहा नागरिक जखमी झाले आहेत. 

बिजापूरपासून सात किलोमीटर अंतरावर असलेल्या बिजापूर खोऱ्यात हा हल्ला करण्यात आला. नक्षलवाद्यांनी घडवून आणलेल्या या आयईडी स्फोटात बीएसएफचे ४ जवान, एक डिआरजी आणि सहा नागरिक जखमी झाले आहेत.

जखमींना तात्काळ बिजापूर रुग्णालयात उपचारासाठी दाखल करण्यात आले. नक्षलविरोधी ऑपरेशनचे महासंचालक पी.सुंदरराज यांनीही या नक्षली हल्ल्याच्या वृत्ताला पृष्टी दिली आहे.

फुटीरतवादी नेते सज्जाद लोन  जम्मू-काश्मीरचे मुख्यमंत्री ?

0
काश्मीर  :  काश्मीरमधील एकेकाळचे फुटीरतवादी नेते सज्जाद लोन हे जम्मू-काश्मीरचे आगामी मुख्यमंत्री म्हणून भाजपची पसंती असल्याची चर्चा आहे. सज्जाद यांनी पंतप्रधान नरेंद्र मोदी यांची भेट घेतल्यानंतर या चर्चेला अधिक उधाण आले आहे. सज्जाद लोन हे फुटीरतावादी नेते आणि हुर्रियतचे ज्येष्ठ नेते अब्दुल गनी लोन यांचे चिरंजीव आहेत.

सज्जाद लोन यांनी पंतप्रधान नरेंद्र मोदी यांची भेट घेतली असली तरी या दोघांमधील चर्चेचा तपशील अद्यापही बाहेर आलेला नाही. मात्र काश्मीरमधील एका निवडणूक प्रचार सभेला संबोधित करताना सज्जाद यांनी मोदींसोबत निवडणुकीसंदर्भात कोणतीही चर्चा झाली नसल्याचं स्पष्ट केलं आहे. ही भेट झाल्यापासून सज्जाद प्रचंड खूश असल्याचंही सांगण्यात येतं.

मोदी आणि सज्जाद यांची भेट घडवून आणण्यामागे भाजपचे महासचिव राम माधव असल्याचं सांगितलं जातं.फुटीरतावादी राजकारणाला सोडचिठ्ठी देत मुख्यप्रवाहात आल्यानंतर सज्जाद यांनी मोदींची भेट घेतली. ही भेट झाल्यापासून सज्जाद यांचा आत्मविश्वास प्रचंड वाढल्याचं त्यांचे निकवर्तीय सांगतात. सज्जाद आता हंदवाड्यातून निवडणूक लढवणार आहेत. त्यांनी त्यांच्या पक्षाला निवडणुकीच्या मैदानात उतरवण्याचा निर्णय घेतल्याने काश्मीर खोऱ्यात त्यांचा पक्ष नॅशनल कॉन्फरन्स, पीडीपी आणि काँग्रेसची डोकेदुखी ठरण्याची शक्यता आहे.

काश्मीरमध्ये भाजपने दहा मुस्लिम उमेदवारांना तिकिट दिलं आहे. तसेच अनेक ठिकाणी इतर उमेदवारांना पाठिंबा दिला आहे. काश्मीरमध्ये बहुमतासाठी ४४ सदस्य संख्येची गरज आहे. या आकड्याच्या जवळपास भाजप आल्यास मुख्यमंत्री  सज्जाद लोन यांच्या नावाला भाजप पाठिंबा देण्याची शक्यता आहे. सज्जाद यांना इतर मुस्लिम आमदारही पाठिंबा देऊ शकतात. त्यामुळे भाजपने आतापासून रणनिती आखायला सुरुवात केली आहे.

अब्दुल गनी लोन आणि सज्जाद लोन यांनी २००२ मध्ये पीपल्स कॉन्फरन्सची स्थापना केली होती. काश्मीरला भारतापासून तोडण्याचा या पक्षाचा मुख्य अजेंडा होता. शिवाय हा पक्षही इतर फुटीरतावाद्यांप्रमाणे निवडणूक लढवण्याच्या विरोधात होता.

२००२ मध्येच अब्दुल गनी लोन यांची हत्या करण्यात आली. तसेच यूपीए सरकारच्या काळात सज्जाद यांना व्हिसा नाकारण्यात आला होता. त्यामुळे सज्जाद हे त्यांच्या पाकिस्तानी नागरिक असलेल्या पत्नीला आणि दोन मुलांना दोन वर्ष भेटू शकले नव्हते. त्यानंतर त्यांनी राजकारणाच्या मुख्य प्रवाहात येण्याचा निर्णय घेतल्याचं सांगण्यात येतं.

पेट्रोल-डिझेल आणखी स्वस्त होणार?

0
file photo

आंतरराष्ट्रीय तेल बाजारात घसरण

नवी दिल्ली : गेल्या २ महिन्यात आंतरराष्ट्रीय तेल बाजारात कच्चा तेलाच्या किंमतीमध्ये सातत्याने वाढ सुरु होती. त्यामुळे दररोज पेट्रोल-डिझेलच्या किंमती वाढत होत्या. याचा थेट परिणाम भारतासह अनेक देशांच्या अर्थव्यवस्थांवर झाला होता. पण आता अमेरिकेच्या हस्तक्षेपानंतर आंतरराष्ट्रीय तेल बाजारात कच्चा तेलाच्या किंमतींमध्ये घसरण सुरु झाली आहे.

सध्या आंतरराष्ट्रीय तेल बाजारात प्रति तेल पिंपाचा दर ६९ डॉलरपेक्षा कमी झाला आहे. सहाजिकच यामुळे पेट्रोल-डिझेलच्या दरांमध्ये आणखी कपात अपेक्षित असून महागाई देखील नियंत्रणात येईल असे दिसून येत आहे.

अमेरिकेने इराणवर निर्बंध लावले आहेत. पण आंतरराष्ट्रीय बाजारातील तेलाच्या किंमतींमुळे अमेरिकेला भारतासह अन्य सात देशांना इराणकडून तेल खरेदीची नाईलाजाने परवानगी द्यावी लागली आहे.

नेहरुंमुळेच एक चहावाला पंतप्रधान झाला – शशी थरूर

0

नवी दिल्ली – काँग्रेस नेते शशी थरूर हे त्यांच्या वादग्रस्त वक्तव्यांसाठी प्रसिद्ध आहेत. थरूर यांनी केलेल्या एका विधानामुळे ते पुन्हा एकदा ते चर्चेत आले आहेत. भारताचे पहिले पंतप्रधान पंडित जवाहरलाल नेहरु यांचे देशाच्या विकासातील योगदान या विषयावर बोलत असताना नेहरुंमुळे एक चहावाला पंतप्रधान म्हणून देशाला लाभल्याचे वक्तव्य शशी थरूर यांनी केले आहे.

थरूर यांनी पंतप्रधान नरेंद्र मोदींवर नाव न घेता टीका केली आहे. नेहरुंच्या जीवनावरील ‘नेहरु : द इन्व्हेन्शन’ या थरूर यांनी लिहीलेल्या पुस्तकाच्या नव्या आवृत्तीच्या प्रकाशन सोहळ्याप्रसंगी आयोजित करण्यात आलेल्या कार्यक्रमात थरूर यांनी सत्ताधारी पक्षावर टीका केली. थरूर यांच्या या वक्तव्यामुळे पुन्हा एकदा वाद निर्माण होण्याची शक्यता आहे.

थरुर म्हणाले, आज आपल्याला एक चहावाला पंतप्रधान म्हणून लाभू शकतो, ते केवळ नेहरुंजीमुळे शक्य झाले आहे. नेहरुंनी निर्माण केलेल्या संस्थात्मक धोरणांमुळे भारतातील प्रत्येक नागरिकाला सर्वोच्च पदावर पोहोचण्याची इच्छाशक्ती निर्माण होते. त्यामुळे नेहरु भारतमातेचे एक महान पुत्र असताना त्यांच्यावर इंटरनेटवरुन चिखलफेक करणारे लिखान केले जाते. त्यांच्या संस्थात्मक रचनांच्या उभारणीकडे जाणीवपूर्वक दुर्लक्ष का केले जाते, असा सवालही त्यांनी केला आहे.

Blog : जगाचे शांतीदूत पंडीत नेहरू

0
भारतात लोकशाही समाजवादाचा पाया घालणारे थोर शिल्पकार आणि जगाला शांततेचे महत्व सांगणारे स्वतंत्र भारताचे पहिले पंतप्रधान पंडीत जवाहरलाल नेहरू यांची आज आज जयंती.

सुखी, समृद्ध आणि ऐश्वर्यसंपन्न अश्या नेहरू घराण्यात दिनांक 14 नोव्हेंबर 1889 रोजी पंडीत जवाहरलाल नेहरू यांचा जन्म अलाहाबाद येथे झाला. त्यांचे वडील मोतीलाल नेहरू वकिलीचा व्यवसाय करीत होते. जवाहरलाल यांना बाहेरील विषम वातावरणाचा संबंध येवू नये यासाठी त्यांचे प्राथमिक शिक्षण इंग्रज गवर्नेसच्या देखरेखीखाली घरीच पूर्ण करण्यात आले.

त्यानंतर पुढील शिक्षणासाठी त्यांना विदेशात पाठविण्यात आले. बैरिस्टरची पदवी मिळवून ते भारतात परतले. विदेशात शिक्षण घेताना जॉन स्टुअर्ट मिल, ग्लैडस्टन, जॉन मोर्ले इत्यादी विचारवंत लेखकांच्या पुस्तक वाचनातून त्यांना राजकीय व सामाजिक जीवनाची माहिती मिळाली. रसेलच्या वाचनातून त्यांनी मानवतावाद आत्मसात केले तर बर्नाड शॉ यांच्यामुळे ते समाजवादी बनले. सन 1916 मध्ये त्यांचा विवाह कमला कौर यांच्याशी झाला.

भारताच्या पहिल्या महिला पंतप्रधान श्रीमती इंदिरा गांधी ह्या त्यांच्या एकुलती एक कन्या होत. भारताच्या स्वातंत्र्यासाठी तुरुंगात असताना इंदिराजींना लिहिलेली पत्रे आजही प्रसिध्द आहेत. त्यांच्या पत्रव्यवहारातूनच इंदिराजीचे व्यक्तिमत्व घडले असे म्हणणे अतिशयोक्तिचे ठरणार नाही.

पं. नेहरुनी आपल्या राजकीय जीवनाची सुरुवात लोकमान्य टिळक आणि अॅनी बेझंट यांच्या होमरूल चळवळीतून केली. महात्मा गांधीजींच्या सहवासात आल्यानंतर त्यांच्या राजकीय कार्याला व्यापक बैठक व निश्चित अशी दिशा मिळाली. सरदार वल्लभभाई पटेल, महात्मा गांधी आणि पंडीत नेहरू या त्रिकुटामुळेच भारताला स्वातंत्र्य मिळाले. पंडीत नेहरू हे गांधीजीचे आवडते शिष्य होते.

स्वतंत्र भारताचे पहिले पंतप्रधान कोण? या प्रश्नांची उकल गांधीजीनी पंडीत नेहरू यांची निवड करून चुटकीसरशी सोडविली. ही निवड सार्थ ठरविताना पंडीत नेहरू यांनी सलग बारा वर्षे पंतप्रधान पदाची धुरा सांभाळली. भारत स्वतंत्र होत असताना निर्वासितांच्या पुनर्वसनाचा प्रश्न, काश्मीरचा प्रश्न, हैद्राबादवरील निजाम आणि गोव्यातील पोर्तुगीज यांच्या विरुद्ध कारवाईचा प्रश्न यासारख्या समस्या त्यांनी सोडविल्या.

देशात लोकशाही समाजवादाचा पाया घालताना पंचवार्षिक योजनेची सुरुवात केली आणि शेती व उद्योगधंद्यास चालना देवून देशाला प्रगती पथावर नेण्याचे काम त्यांनी आपल्या करकिर्दीत केले.

भारताला स्वातंत्र्य मिळवून देण्यासाठी त्यांना अनेकवेळा तुरुंगवास भोगावा लागला. बेचाळीसच्या लढ्यात त्यांना अहमदनगरच्या तुरुंगात तीन वर्षे काढावे लागले. याच काळात त्यांनी जगप्रसिध्द अशी ऐतिहासिक कादंबरी डिस्कवरी ऑफ इंडिया ( भारत एक खोज ) आणि ग्लिम्पसेस ऑफ वर्ल्ड हिस्ट्री हे ग्रंथ लिहून काढले.

कॉंग्रेसच्या सरचिटणीसपदी निवड झाल्यानंतर त्यांनी संपूर्ण भारतभ्रमण केले. या प्रवासात त्यांना भारतातील गरिबी आणि दारिद्रय फार जवळून पाहायला मिळाले. या जनतेचे दारिद्रय दूर केले नाही तर आपले जीवन व्यर्थ आहे असे त्यांनी त्यावेळीच ठरविले. समाजातील प्रत्येक व्यक्तीला महत्त्व आहे आणि तिला पूर्ण विकासाची संधी द्यायला हवी असा त्यांचा आग्रह होता.

आंतरराष्ट्रीय प्रश्न शांततेने सोडविण्याच्या दृष्टीने त्यांनी जगासमोर पंचशील तत्वे मांडली. त्यांच्या या विचाराचा गौरव करून त्यांना शांतीदूत ( एंजेल ऑफ पीस ) पुरस्कार प्रदान करण्यात आला. त्यामुळे जगात भारत देशाची एक वेगळीच छाप पाडण्यात ते यशस्वी झाले.

पंडीत नेहरू यांना जीवनात फक्त दोनच गोष्टीचे विशेष असे आकर्षण होते, एक म्हणजे गुलाबाचे फुल आणि दुसरे म्हणजे लहान मूल. गुलाबाच्या फुलाच्या सुगंधाप्रमाणे त्यांचे कार्य सर्वत्र दरवळत राहिले. मुलांवर त्यांचे खुप प्रेम होते म्हणून लहान मुलांचे ते चाचा नेहरू बनले. त्यांचा जन्मदिन संपूर्ण भारतात बालदिन म्हणून साजरा केला जातो.

पंडीत नेहरू किती हळव्या मनाचे होते हे एका अनुभवावरुन सिध्द होते, सन 1962 च्या भारत-चीन युध्दाच्या वेळी भारताची गानकोकिळा लता मंगेशकर यांनी गायिलेल्या कवी प्रदीप यांच्या ए मेरे वतन के लोगो हे गीत ऐकून नेहरूजींच्या डोळ्यात अश्रू उभे राहिले होते, असा अनुभव वाचण्यास मिळतो. याच युध्दाच्या धकाधकीतून ते सावरले नाहीत आणि अखेर 27 मे 1964 रोजी हा तेजस्वी तारा निखळला.

त्यांनी आपली शेवटची ईच्छा लिहिली होती की, माझ्या देहाची मूठभर रक्षा गंगेत टाकावी, तेथून ती उंच आकाशात न्यावी, जिथे शेतकरी काम करतो त्या शेतात पडावी. माझ्या देहाचा कणनकण मातृभूमीच्या मातीशी एकरूप व्हावी, हीच माझी अखेरची ईच्छा आहे. पं. नेहरूच्या पावन स्मृतीस विनम्र अभिवादन..!

– नागोराव सा. येवतीकर, प्राथमिक शिक्षक, मु. येवती ता. धर्माबाद, 9423625769

नांदुरी येथे आदिवासी महामेळाव्यात होणार नव्या पक्षाची घोषणा

0

नाशिक । दि. 13 प्रतिनिधी
शहीद क्रांतिकारक बिरसा मुंडा व राघोजी भांगरे यांच्या संयुक्त जयंती उत्सवानिमित्त कळवण तालुक्यातील नांदुरी येथे आदिवासी महामेळाव्याचे आयोजन करण्यात आल्याची माहिती भारतीय ट्रायबल पार्टीचे प्रदेशाध्यक्ष मेघनाद गवळी यांनी पत्रकार परिषदेत दिली.

नांदुरी येथे गुरुवारी (दि.15) सकाळी आदिवासींच्या विविध सांस्कृतिक कार्यक्रमांनी मेळाव्यास सुरुवात होणार आहे. उद्घाटन समारंभाला गुजरातचे आ. छोटू वसावा व आ. महेश वसावा उपस्थित राहणार आहेत. याप्रसंगी भारतीय ट्रायबल पार्टीची घोषणा करण्यात येणार आहे. आदिवासी समाजाचे अनेक आमदार तसेच मंत्री आहेत. मात्र ते सत्ताधारी तसेच विरोधी पक्षाशी संबंधित असल्याने ते पक्षाच्या धोरणाशी बांधिल राहतात. आदिवासींचा विकास व समस्यांचा त्यांना सोयीस्कर विसर पडतो. आदिवासी समाजाचे प्रश्न गंभीर आहेत.

राज्यघटनेतील अनुसूची 5 व 6 ची अंमलबजावणी जाणीवपूर्वक केली जात नाही. आदिवासी बांधवांना अद्याप वनहक्काची जमीन मिळालेली नाही. आदिवासी विभाग, आश्रमशाळा यामध्ये मोठ्या प्रमाणात जागा रिक्त आहेत. आश्रमशाळा वसतिगृहांमध्ये पुरेशा सुविधा नाहीत. आदिवसी मुले महागडे शिक्षण घेऊ शकत नाहीत. यामुळे बेरोजगारी वाढत चालली आहे. तसेच दुसरीकडे कुपोषणाची समस्या गंभीर आहे.

आदिवासींचे प्रश्न आदिवासी पक्षच चांगल्यारितीने सोडवू शकत असल्याने या पक्षाची घोषणा करण्यात येत असल्याचे गवळी यांनी सांगितले. यावेळी पक्षाचे संघटक दत्ता बर्डे, दत्ता निकम आदी उपस्थित होते.

Social Media

26,822FansLike
5,154FollowersFollow
1,345SubscribersSubscribe
error: Content is protected !!