मंगळवार, 25 सप्टेंबर 2018

0

सांगवीत वाळू उपसा करणारे 12 जण अटकेत

0

चार जेसीबी, ट्रॅक्टरसह दोन कोटींचा मुद्देमाल हस्तगत

श्रीगोंदा (तालुका प्रतिनिधी) – श्रीगोंदा तालुक्यातील घोड, भीमा, हंगा, सीना नदीच्या पात्रासह छोटे, मोठे नद्या नाले ओढे यातून अवैध रित्या वाळू तस्करी जोमात सुरु आहे. याबाबत कारवाई मात्र होताना दिसत नाही. प्रांताधिकारी गोविंद दाणेज याना बनपिंप्री मध्ये बेदम मारहाण करण्यात आल्याने व या प्रकरणानंतर वाळू तस्करांच्यावर जोरात कारवाई होण्याऐवजी महसूल प्रशासनाने श्रीगोंद्याचे पोलीस निरीक्षक यांना खिंडीत पकडण्याचा प्रयत्न केला. भीमा आणि घोड नदीच्या संगमाजवळ पोलीस उपअधीक्षक संजय मीना आणि उपविभागीय पोलीस अधिकारी सुदर्शन मुंढे यांच्या संयुक्त पथकाने वाळू तस्करांच्या विरोधात दमदार कारवाई केली. त्यात चार जेसीबी यंत्र चार ट्रॅक्टर अंदाजे दोन कोटी रुपयांचा मुद्देमाल आणि अवैध वाळू उपसा करणार्‍या 12 जणांना ताब्यात घेतले. ही कारवाई उशिरा पर्यंत सुरु होती.

तालुक्यात वाळू तस्करांना मोकळे मैदान मिळाले असून महसूल प्रशासनाच्या कारवाई नंतरही गावगावात वाळूचा अवैध उपसा सुरूच आहे. यावर कारवाई होताना अडचणी येत असून बनपिंप्री शिवारात प्रांताधिकारी यांच्यावर झालेला हल्ला यातून महसूल अधिकारी आणि कर्मचारी यांनी गौण खनिज आणि वाळूच्या विरोधात पोलीस संरक्षणाशिवाय कारवाई करणार नाही असे निवेदन दिले. त्यानंतर आणि महसूल कर्मचारी आणि अधिकारी यांच्यात आणि पोलीस प्रशासन यांच्यात सुरू असलेला अंतर्गत वाद सुरु झाला. घोड, आणि भीमा नदीच्या संगममाजवळ घोडच्या बंधार्‍या जवळ अवैध रित्या वाळू उपसा सुरु असल्याची माहिती पोलीस अधिकार्‍यांना मिळाल्यांनतर पोलीस उप अधीक्षक जयंत मीना यांच्यासह उविभागीय पोलीस अधिकारी सुदर्शन मुंढे, श्रीगोंद्याचे पोलीस निरीक्षक बाजीराव पोवार यांच्या संयुक्त पथकाने सांगवी हद्दीत नदीच्या पात्रात कारवाई केली. त्यात सुमारे दोन कोटी रुपयांचा मुद्देमाल जप्त केला. यात वाळू उपसा करणारे चार जेसीबी यंत्र आणि ट्रॅक्टर यांचा समावेश आहे. तसेच विनापरवाना वाळू उपसा करणारे 12 वाळू तस्करांना ताब्यात घेतले आहे. सायंकाळी उशिरा कारवाईला सुरुवात केल्याने उशिरापर्यंत गुन्हा दाखल करण्याचे काम सुरू होते.

जिल्हाधिकार्‍यांच्या डोळ्यात अंजन
तालुक्यात मोठ्या प्रमाणात अवैध वाळू उपसा सुरु आहे. महसूल प्रशासन कारवाई करत असले तरी वाळू तस्करी बंद होत नाही. श्रीगोंद्याच्या तहसलीदाारांची वाळू व्यावसायिकाबरोबरच्या हवाई सफर बाबत बातम्या प्रसिद्ध झाल्या होत्या. यानंतर प्रांताधिकारी दाणेज यांच्यावर वाळू तस्करांनी हल्ला केला. यानंतर पोलीस निरीक्षक बाजीराव पोवार यांनी वादग्रस्त वक्त्यव्य केले. तेव्हा महसूल कर्मचारी आक्रमक झाले. जिल्हाधिकार्‍यांनी पोवार यांच्याकडील वाळू बाबत सर्व तपास काढून घेण्याबाबत पोलीस अधीक्षकांना पत्र दिले. या वेळी पोलीस पथकाने ही कारवाई करणे म्हणजे महसूल प्रशासन कुठे तरी कमी पडत असेल! अशी घटना जिल्हाधिकारी यांच्याच डोळ्यात अंजन घालणारी असल्याबाबत चर्चा आहे.

गणेश मंडळाचे स्टेज काढण्यावरून दोन गटांत तुंबळ हाणामारी

0

परस्परविरोधी फिर्यादी दाखल, चौघे अटक

संगमनेर (प्रतिनिधी) – गणेश मंडळांचे स्टेज काढण्याच्या कारणावरुन दोन गटांमध्ये तुंबळ हाणामारी झाल्याची घटना रविवारी गणेश विसर्जनाच्या दिवशी वैदुवाडी येथे घडली. याप्रकरणी शहर पोलीस ठाण्यात परस्परविरोधी फिर्यादी दाखल झाल्या असून चौघांजणांना पोलिसांनी अटक केली आहे.  वैदुवाडी येथे एकाच रस्त्यावर दोन गणेश मंडळांनी गणेश स्थापना केली होती. रविवारी गणेश विसर्जनाच्या दिवशी संदीप साहेबराव शिंदे याने दुसर्‍या मंडळाच्या लोकांना आमची गणेश विसर्जन मिरवणूक काढायची आहे, तेव्हा तुमचे स्टेज लवकर काढून घ्या असे म्हटले, त्यावरुन राम चंद्रभान शिंदे, किरण माथा शिंदे, विनोद राजू शिंदे, अशोक सवरग्या शिंदे व इतर 9 जणांनी संदीप शिंदे यास शिवीगाळ करत दमदाटी करत काठी व दगडाने मारहाण केली. या मारहाणीत तो जखमी झाला. याबाबत संदीप शिंदे याने शहर पोलीस ठाण्यात फिर्याद दिली. त्यानुसार पोलिसांनी वरील 13 जणांविरुद्ध गुन्हा रजिस्टर नंबर 314/18 भारतीय दंड संहिता 143, 147, 149, 324, 504, 506 प्रमाणे दाखल केला आहे. अधिक तपास पोलीस हेड कॉन्स्टेबल पवार करत आहेत.

तर परस्पर विरुद्ध फिर्यादीत अशोक सवरग्या शिंदे यांनी म्हटले आहे की, सागर शिंदे यास तुमचे गणपतीचे स्टेज काढून घ्या, इतका वेळ कशाला लागतो. तुम्हाला सकाळीच सांगितले होते. आमची गणेश विसर्जन मिरवणूक काढायची आहे. असे म्हणाल्याचा सागर भाऊसाहेब शिंदे यास राग आला. तो व त्याच्याबरोबर राजू मुस्लीग्या शिंदे, सवरग्या रामा शिंदे, अशोक साहेबराव शिंदे व इतर 20 जणांनी तेथे येऊन फिर्यादी व साक्षीदारांना शिवीगाळ व दमदाटी करत लाथाबुक्यांनी, लोखंडी गज, दगड, बॅटने मारहाण केली. शहर पोलिसांनी अशोक सवरग्या शिंदे यांच्या फिर्यादीनुसार वरील 20 जणांविरुद्ध गुन्हा रजिस्टर नंबर 315/18 नुसार दाखल केला आहे. अधिक तपास पोलीस निरीक्षक अभय परमार यांच्या मार्गदर्शनाखाली पोलीस करीत आहे. सदर गुन्ह्यांमध्ये अशोक सवरग्या शिंदे, संदीप साहेबराव शिंदे, दिपक ऊर्फ राजू मुस्लीग्या शिंदे, अशोक साहेबराव शिंदे या चौघांना पोलिसांनी अटक केली आहे.

कोपरगावात गणेशविसर्जन मिरवणुकीत कार्यकर्ते व पोलिसांत राडा

0

पोलिसांचा लाठीमार : चार जखमी, 200 जणांवर गुन्हे दाखल

कोपरगाव (तालुका प्रतिनिधी) – गणेश विसर्जन प्रसंगी प्रगत शिवाजीरोड संयुक्त गणेश मंडळ व राजमुद्रा प्रतिष्ठान दरम्यान गणपती मागेपुढे घेण्यावरून वादावादी झाल्याची खबर पोलिसांना मिळाल्यानंतर पोलीस निरीक्षक राकेश मानगावकर सहपोलीस ताफा भाजीमार्केट समोर नगरपालिकेच्या रोडवर पोलिसांनी परिस्थिती नियंत्रणात आणण्यासाठी दोन्ही मंडळांच्या सदस्यांना समजावून सांगितले परतु प्रगतच्या कांही कार्यकर्त्यांची पोलिसांशी बाचाबाची झाली व एकाने पोलिसाची गच्ची पकडून हुज्जत घातल्याने शेवटी पोलिसांना लाठीमार करावा लागला. यात प्रगतचे पाच कार्यकर्ते जखमी झाल्याची घटना रविवारी संध्याकाळ घडली आहे.

रविवारी सायकाळी 5 वाजेच्या सुमारांस पोलीस निरीक्षक राकेश मानगावकर, सपोनि बोरसे, पोसई नागरे, सहा. फौ. मिसाळ पो. कॉ. गवसेणे, पाखरे, वाघ, गवारे, अग्रवाल तसेच दौंड येथील एक एसआरपी प्लाटून असे विघ्नेश्वर चौकात गणपती विसर्जन बंदोबस्त करीत होते. तेवढ्यात आंबेडकर पुतळ्यापासून बॅरिकेट तोडून प्रगत शिवाजीरोड संयुक्त गणेश मंडळ ढोल पथकासह विघ्नेश्वर चौकात आले. 150 ते 200 कार्यकर्त्यांनी येऊन येथूनच मिरवणूक काढू द्या म्हणून पोलीस यंत्रणेशी हुज्जत घालण्यास सुरुवत केली. सदर मंडळातील कार्यकर्ते पोलिसांनाच दमबाजी करीत होते. पोलिसांनी त्यांना समजावून सांगून नगरपालिका रोडने गणपती व ढोल पथक घेऊन येण्यास सांगितले. त्यानंतर ते तेथून निघून गेले. परंतु पुन्हा 5.45 सुमारांस नगरपालिका रोडवर प्रगत शिवाजीरोड संयुक्त गणेश मंडळ व राजमुद्रा प्रतिष्ठानच्या कार्यकर्त्यांमध्ये गणपती मिरवणूक क्रमांकावरुन भांडणे सुरु झाली. प्रगत शिवाजी रोडचे कार्यकर्ते आक्रमक झाले.

त्यावेळी सुमित बिडवे याने पो.कॉ.पाखरे याची पोलीस गणवेशात असतांना गचांडी धरुन छातीवर व तोंडावर बुक्की मारुन पोलीसांची काय लायकी आहे? व अन्य कार्यकर्त्यांनी पोलीसांना शिवीगाळ व धक्काबुक्की केल्याचे पो.ना.सुरेश देशमुख यांनी दिलेल्या फिर्यादीत म्हटले आहे. या फिर्यादी नुसार विजय चव्हाण, अमृत काकड, वैभव आढाव, लक्ष्मण बागुल, विजेंद्र आदमाने, विशाल लकारे, नितीन आढाव, भुषण नरोडे, विक्रांत कुदळे, सागर नरोडे, रवि डमाळे, मानस लचके, साई नरोडे, योगेश शिदे, अमोल महाले, रोहित आढाव, योगेश शेलार, विकास आढाव, आबा नरोडे, सतिष भगत, महेश मते, मनोज आढाव, महेश आढाव, विशाल आढाव, सुमित बिडवे सर्व रा.कोपरगांव व इतर 150 ते 200 कार्यकर्त्यांवर भादवि कलम 353, 332, 323, 504, 506, 143, 146, 147, 149, व म.पो अधिनियम 1951 चे कलम 37,1,3 प्रमाणे गुन्हा दाखल झाला आहे.

प्रगत शिवाजीरोड संयुक्त गणेश मंडळाने पोलीसांनी आम्हाला सहकार्य करण्याऐवजी आमच्या कार्यकर्त्यांवर जाणून बुजून लाठीचार्ज केल्याचा आरोप वैभव आढाव यांनी केला असून पोलिसांच्या या कृत्याचा निषेध केला आहे. पोलिसांनी केलेल्या लाठीचार्ज मध्ये चार कार्यकर्ते जखमी झाले त्यात विजय चव्हाण यांच्या डोक्याला जबर दुखापत झाली असून 10 ते 15 टाके पडले आहेत. अमृत काकड याच्या डोळ्याला जखम झाली असून वैभव आढाव व लक्ष्मण बागुल यांना पाठीला व कंबरेला दुखापत झाल्याचे समजते.

 

‘हुमणी’ मुळे 38 हजार हेक्टरवरील ऊस संकटात

0

सर्वाधिक श्रीगोंदा, राहुरी, नेवासा तालुक्यांत फटका, सरकारकडून दिलासा नाही

अहमदनगर (प्रतिनिधी)- पावसाने खंड दिल्याने जिल्ह्यातील ऊस पीक अडचणीत असताना आता हुमणी अळीच्या आक्रमणामुळे ऊस पिकाची वाट लागण्याची वेळ आली आहे. जिल्ह्यात 38 हजार हेक्टरवरील ऊस पिकाला हुमणीचा दणका बसला आहे. यात सर्वाधिक बाधीत क्षेत्र हे श्रीगोंदा, राहुरी आणि नेवासा तालुक्यांतील आहे. दरम्यान, हुमणीग्रस्त क्षेत्राची आकडेवारी जिल्हाधिकारी कार्यालयामार्फत राज्य सरकारला सादर करण्यात आली आहे. मात्र, मदत, भरपाईची भाषा सोडा सरकारकडून साधे हुमणीग्रस्त क्षेत्राचे पंचनामे करण्याचे आदेश दिले गेलेले नाहीत.

ऊस पिकावर हुमणी अळीचा दरवर्षी प्रादुर्भाव असतोच. मात्र, यंदा पावसाने खंड दिल्याने हुमणी अळीने मोठ्या प्रमाणात डोकं वर काढले आहे. हुमणी किडरोगास कारणीभूत असणार्‍या अळीला कुचलेला पाला-पाचोळा, गवत आदी उपलब्ध न झाल्याने या अळीने थेट ऊस पिकाकडे आपला मोर्चा वळविला आहे. यामुळे जिल्ह्यात सर्वच तालुक्यात कमी अधिक प्रमाणात हुमणी पिकाचा प्रार्दुभाव दिसत आहे. या किड रोगाचा बंदोबस्त करतांना शेतकर्‍यांच्या नाकीनऊ आले आहे.
कृषी विभाागाच्या म्हणण्यानुसार हुमणी नियंत्रणासाठी किटक नाशकांसोबत भरपूर पाण्याची आवश्यकता असून या किड रोगातील अळी जोपर्यंत पूर्णपणे दोन सरीतील पाण्यात बुडणार नाहीत. त्याच्या शरिरात किटक नाशकांचे प्रमाण जाणार नाहीत, तोपर्यंत या किड अळीचा बंदोबस्त अशक्य आहे. जिल्ह्यात अनेक भागात हुमणीचा उद्रेक झाला असून पाऊस लांबल्यास हुमणीचा फटकवा वाढणार असल्याची भिती कृषी विभागाला आहे. जिल्ह्यात यंदा 1 लाख 34 हजार हेक्टरवर ऊस पिक उभा आहे. यातील 38 हजार हेक्टरवरील ऊस पिक हुमणीने बाधीत आहे. कृषी विभागाने हुमणीचा उद्रेक झाल्यानंतर तातडीने तालुकानिहाय बाधीत क्षेत्राचे पंचानामे करून जिल्हाधिकारी यांच्या मार्फत राज्य सरकारच्या मदत कार्य आणि पुर्नवसन विभागाला त्याचा अहवाल दिलेला आहे. मात्र, सरकारकडून अजून बाधीत ऊसाच्या क्षेत्राचे पंचानामे करण्याचे आदेश दिलेले नाहीत.

तालुकनिहाय बाधीतक्षेत्र हेक्टरमध्ये (कंसा लागवड क्षेत्र)
नगर 35 (844), पारनेर 3 हजार (3500), पाथर्डी 1 हजार 45 (8833), कर्जत 350 (5876), जामखेड 310 (4407), श्रीगांेंदा 9 हजार (25278), श्रीरामपूर 2 हजार 539 (9730), राहुरी 5 हजार 583 (20355), नेवासा 4 हजार 100 (34278), शेवगाव 3 हजार 235 (24053), संगमनेर 3 हजार 800 (9124), कोपरगाव 1 हजार 100 (8221), राहाता 3 हजार 696, अकोले 178 (5 हजार 363) यांचा समावेश आहे.

पाऊस आणखीन लांबल्यास हुमणीचा विळखा आणखी घट्ट होणार आहे. यामुळे कृषी विभागाचे डोक चक्रावले असून आता पाऊस झाल्यास हुमणीतून बचाव शक्य असल्याचे सांगण्यात आले. शेतकर्‍यांनी मुबलक पाण्यात कृषी विभागाने सांगितलेल्या किटक नाशकांचा योग्य प्रमाणात वापर केल्यास हुमणीचा प्रतिबंध शक्य असल्याचे सांगण्यात आले.

अकोलेत स्वाईन फ्लूचा तिसरा बळी

0

आरोग्य विभाग खडबडून जागा

अकोले (प्रतिनिधी)- तालुक्यात स्वाईन फ्लूचा फैलाव झपाट्याने होत असून काल तांभोळ (ता.अकोले) येथील युवकाचा मृत्यू स्वाईन फ्लूने झाल्याने मृतांची संख्या आता तीनवर पोहचली आहे. सुरेश नामदेव हरणामे (वय-35) हा आजारी स्थितीमध्ये काल नाशिक येथील सिव्हिल हॉस्पिटलमध्ये उपचार घेत असताना दगावला. जिल्ह्यातील बळींची संख्या आता 16 वर गेली आहे.

त्यापूर्वी त्याने अकोले येथे दोन खासगी दवाखान्यांत उपचार घेतले. मात्र त्याची प्रकृती सुधारली नाही. त्यानंतर नाशिक येथे सिव्हिल हॉस्पिटलमध्ये हरणामे यांना दाखल केले गेले त्यांना स्वाईन फ्लूची लक्षणे सांगून रुग्ण उशिरा दाखल झाल्याने अगतिकता व्यक्त केली. दरम्यान अनेक रुग्ण खासगी रुग्णालयात उपचार घेत असल्याने त्याचा अहवाल तालुका आरोग्य विभागास अद्याप प्राप्त झालेला नाही.
यापूर्वी शकीला खलील शेख (वय 52,रा. समशेरपूर) यांचेही स्वाईन फ्लू ने निधन झाले तर लक्ष्मीबाई गोरख गोडसे (वय 51, रा. मोग्रस) यांचाही स्वाईन फ्लू ने घास घेतला आहे. तर मच्छींद्र संपत कोरडे (वय 43, रा. लिंगदेव) या रुग्णाचे पुणे येथे वास्तव्यास असतांना स्वाईन फ्लू ने निधन झाले. त्यामुळे नागरिकांमध्ये भीतीचे वातावरण निर्माण झाले आहे. तांभोळ येथील सुरेश हरणामे हा कुटुंब प्रमुख दगावल्याने हळहळ व्यक्त केली जात आहे. त्याच्या पश्‍चात पत्नी, मुलगा, दोन मुली, दोन भाऊ असा परिवार आहे.

दरम्यान तालुका आरोग्य अधिकारी डॉ. इंद्रजित गंभीरे यांच्याशी संपर्क साधला असता नागरिकांनी घाबरून जाऊ नये, अफवांवर विश्‍वास ठेऊ नये असे, आवाहन त्यांनी केले आहे. शिवाय साबणाने व स्वच्छ पाण्याने हात धुवावते, पौष्टिक व हिरव्या पालेभाज्यांचा आहार घ्यावा, धूम्रपान टाळावे, भरपूर पाणी प्यावे, व सार्वजनिक ठिकाणी थुंकू नये, अशाही खबरदारीच्या सूचनाही त्यांनी केल्या आहे. स्वाईन फ्लू ने मृत्यू झाल्यानंतर त्यांच्या संपर्कात आलेल्या सर्वांना टेमी फ्लू च्या गोळ्या देण्यात आल्या आहेत. त्यांच्या आजारपणा बाबतचा पूर्व इतिहास व अन्य माहिती जिल्हा आरोग्य अधिकार्‍यांकडे पाठविलेली आहे. प्रयोगशाळेचा अहवाल प्राप्त झाल्यानंतरच त्यांचा मृत्यू स्वाईन फ्लू ने झाला की नाही हे स्पष्ट होईल. दरम्यान आरोग्य विभागामार्फत तालुक्यात प्रतिबंधात्मक उपाय योजना म्हणून खासगी वैद्यकीय व्यावसायिकांच्या बैठका घेण्याचे काम सुरू आहे.

 

कोळपेवाडी दरोडा : मास्टरमाईंड पपड्या साधूच्या वेशात जेरबंद

0
कोळपेवाडी दरोड्यातील मास्टरमाईंड पपड्या उर्फ राहुल व्यंकटी काळे याला स्थानिक गुन्हे शाखेने मेहकर जि. बुलढाणा येथून साधूच्या वेशात जेरबंद केले. यावेळी जिल्हा पोलीस प्रमुख रंजनकुमार शर्मा, अप्पर पोलीस अधीक्षक जयत मीना, पोलीस निरीक्षक दिलीप पवार, स्थानिक गुन्हे शाखेचे अधिकारी.

स्थानिक गुन्हे शाखेची कामगिरी: आतापर्यंत 16 आरोपी पकडले

अहमदनगर/ कोपरगाव(प्रतिनिधी)- दरोडेखोरांच्या टोळीने कोळपेवाडी (ता. कोपरगाव) येथील लक्ष्मी ज्वेलर्सवर दरोडा टाकून दुकान मालक शाम सुभाष घाडगे व गणेश सुभाष घाडगे यांच्यावर बंदुकीतून गोळ्या झाडल्या होत्या. यात शाम घाडगे मयत झाले होते तर गणेश गंभीर जखमी झाले होते. यावेळी दरोडेखोरांनी लाखोंच्या सोन्याची लूट करत पलायन केले. संपूर्ण राज्याला हादरवून सोडणार्‍या या दरोड्याचा मास्टरमाईंड आणि महाराष्ट्रसह तीन राज्यांत कुप्रसिध्द असणार्‍या पपड्या उर्फ राहुल व्यंकटी उर्फमहादू उर्फ महादेव उर्फ गणपती काळे रा. वर्धा याला नगरच्या स्थानिक गुन्हे शाखेने मेहकर (जि. बुलढाणा) येथून साधूच्या वेषात पत्नी आणि मुलासह सोमवारी पहाटे मोठ्या शिताफीने जेरबंद केले.

या दरोडा प्रकरणात अटक आरोपींची संख्या आता 16 झाली आहे. पपड्या काळेच्या अटकेमुळे आता दरोड्यातील उर्वरित 7 ते 8 आरोपींना लवकरच पकडण्यात यश येईल, अशी माहिती पोलीस अधीक्षक रंजनकुमार शर्मा यांनी सोमवारी नगरला पत्रकार परिषदेत दिली.
19 ऑगस्ट 2018 रोजी कोळपेवाडी येथील लक्ष्मी ज्वेलर्सचे मालक गणेश घाडगे व शाम घाडगे यांच्यावर दरोडेखोरांनी गोळीबार करुन शाम धाडगे यांची हत्या करुन दुकानातील सोन्याचे व चांदीचे दागिने दरोडा टाकून चोरुन नेण्यात आले होते. घटनेबाबत कोपरगाव पोलिस ठाण्यात भादंवि कलम 396, 397 सह आर्म अ‍ॅक्ट कलम 3, 4/25 प्रमाणे गुन्हा दाखल आहे. या गुन्ह्याचा समांतर तपास स्थानिक गुन्हे शाखेचे निरीक्षक दिलीप पवार करत या दरोडेखोरांच्या टोळीतील 13 आरोपी व चोरीचे सोने विकत घेणारे 3 सराफ असे एकूण 16 आरोपी अटक करण्यात आलेली आहे. या घटनेतील मुख्य आरोपी मात्र फरार होता. त्याला पकडण्याचे मोठे आव्हान पोलिसांसमोर होते. पोलीस निरीक्षक पवार यांनी सदर गुन्ह्यातील मास्टरमाईंड मुख्य आरोपी पपड्या उर्फ राहुल व्यंकटी काळे हा सेंदला, (ता. मेहेकर, जि. बुलढाणा) येथे पारधी वस्तीवर पत्नी रेखा पपड्या काळे हीस भेटण्यासाठी साधूचे वेषामध्ये येणार असल्याची गोपनीय माहिती मिळाली.

पोलीस निरिक्षक पवार त्यांच्यासोबत स्थानिक गुन्हे शाखेच्या पथकातील पोसई रोहन खंडागळे, हवालदार सुनील चव्हाण, योगेश गोसावी, नानेकर, पोना मल्लिकार्जुन बनकर, दिगंबर कारखेले, अण्णा पवार, विनोद मासाळकर, रवी कर्डिले, दत्तात्रय गव्हाणे, रवि सोनटक्के, दीपक शिंदे, मनोज गोसावी, मन्सूर सय्यद, सचिन अडबल, संतोष लोंढे, राहुल सोळुंके, भागीनाथ पंचमुख, योगेश सातपुते, पोहेकॉ. देवीदास काळे, विजय ठोंबरे, बाबासाहेब भोपळे, पोकॉ. वाघमारे, खताळ, साठे यांनी सोमवारी (दि.24) रोजी पहाटे 3 वाजता मेहेकर येथील पारधी वस्तीवर छापा टाकला. त्यावेळी पपड्या हा थोड्याच वेळापूर्वी पत्नी रेखा हीस सोबत घेऊन मेहकर बस स्टॅण्ड येथे गेला असल्याची माहिती मिळाली.

पवार यांनी तात्काळ पथकातील अधिकारी व कर्मचारी यांच्यासह मेहकर बस स्टॅण्ड येथे जावून मेहकर पोलिस ठाण्याचे आत्माराम प्रधान, हवालदार संजय पवार, देवीचंद चव्हाण, गजानन सानप, पंढरी गिते, उमेश घुगे, अतुल पवार, श्रीराम निळे, पो. कॉ. गणेश लोंढे, संजय जाधव, देवेंद्र इंगळे, गजानन पांढरे यांचे मदतीने मेहकर बस स्टॅण्ड येथे सापळा लावून परिसराची नाकाबंदी केली. पपड्या काळे व त्याची पत्नी रेखा हे दोघे बसमधून पळून जाण्याच्या तयारीत असताना त्यांना मोठ्या शिताफीने ताब्यात घेतले.

त्यावेळी पपड्या काळे याने त्याचे नाव संजय महादू काळे असे सांगून स्वतःची पूर्वीची ओळख लपविण्यासाठी भगवे कपडे घालून दाढी वाढवून साधूच्या वेषामध्ये रुद्राक्ष माळा विक्रीसाठी जवळ ठेवल्याच्या आढळून आल्या. परंतु पोलिसांचे अभिलेखावर असलेल्या त्याचे अंगावरील जुन्या खुणा, निशाणी यावरुन तो पपड्या काळे हाच असल्याची खात्री झाल्याने त्यास विश्‍वासात घेऊन त्यास त्याचे खरे नाव विचारले असता त्याने त्याचे नाव पपड्या उर्फ संजय उर्फ राहुल व्यंकटी उर्फ महादू उर्फ महादेव उर्फ गणपती काळे उर्फ तुकाराम चव्हाण रा. सुदर्शननगर, वर्धा असे सांगितले. तसेच त्याचेसोबत असलेल्या त्याचे बायकोस तिचे नाव विचारले असता तिने तिचे नाव रेखा पपड्या काये (वय 40) रा. सुदर्शननगर, वर्धा असे सांगितले.

पपड्या काळे हा सराफ दुकानावर दरोडे घालणारा कुख्यात दरोडेखोर असून त्याचे टोळीने यापूर्वी आंध्रप्रदेश, मध्यप्रदेश, महाराष्ट्र अशा ठिकाणी सराफी दुकानावर सायंकाळचे वेळेस दुकानासमोर दगडफेक करुन दंगल सदृष्य परस्त्तिी निर्माण करून व गावठी कट्ट्यातून गोळीबार करून सराफ व्यवसाईकांची हत्या करून दरोडे टाकलेले आहे. यात त्याला जन्मठेपेची शिक्षा झालेली आहे. नागपूर कारागृहात शिक्षा भोगीत असताना मुलाच्या लग्नासाठी पॅरोलवर आल्यानंतर त्याने कोळपेवाडी येथे दरोडा टाकला.

छातीवर गोंदलेल्या नावामुळे ओळख पटली
पपड्या अनेक नावाने राज्यात वावरत होता. प्रत्येक ठिकाणी तो नवे नाव धारण करून फिरत असे. नगर पोलिसांनी त्याला साधूच्या वेशात पकडलं अन् त्याची ओळख पटविण्याचा अवघड कामही सोप्पं केले. त्याच्या नावाच्या गुन्ह्यांनी पोलिस डायर्‍यांची अनेक पाने भरली आहेत. त्यात त्याच्या छातीवर ‘ पहिल्या प्रमिकेचे नाव ‘छबी’ असे गोंदलेले असल्याचा उल्लेख पोलीस दप्तरी आहे. त्याने नगर पोलिसांना उडवाउडवीची उत्तरं दिल्यानंतर पोलिसांनी त्याच्या छातीची तपासणी केली. त्यावेळी ‘छबी’ दिसली. त्यामुळं तोच पपड्या असल्यावर शिक्कामोर्तब झालं.यवतमाळमध्ये पपड्याने रिमांड घेणार्‍या पीएसआयाचा पोलीस कॉलेनीतील घरातून घूसून खून केला होता.

कोळपेवाडी दरोड्यात प्रथमदर्शनी 24 आरोपींनी एकत्र येऊन कट रचून दरोडा टाकला असल्याचे तपासात समोर आलेले आहे. यातील 16 आरोपी पकडण्यात आले असून पपड्यामुळे आता उर्वरित आरोपींना जेरबंद करण्यात येणार आहे. पपड्याची बायको ही या गुन्ह्यातील पकडण्यात आलेली पहिली महिला आरोपी असल्याचे पोलीसांनी सांगितले. या दरोड्यातील पपड्या मुख्य सुत्रधार असून त्यांच्या विरोधात नगर पोलीस ठाण्यात तिहेरी हत्याकांडाचा गुन्हा दाखल आहे. त्याच्या विरोधात राज्यातील सर्व गुन्हे एकत्र करण्याची प्रकिया सुरू असल्याचे सांगण्यात आले. पपड्या विरोधात 12 पोलीस ठाण्यात गंभीर स्वरूपाचे गुन्हे दाखल असून यासह नेवासा, जळगाव, सिंधखेड राजा, देऊळगाव राजा, जालना, बालाघाट उत्तरप्रदेश, भोपाळ या ठिकाणी 2006 पूर्वी अनेक गुन्हे दाखल आहेत.

 

बाप्पांना भावपूर्ण निरोप

0
कोपरगाव शहरात विघ्नहर्त्या गणरायाला जल्लोषात निरोप देण्यात आला. मात्र यावेळी दोन मंडळांत झालेल्या हाणामारीमुळे गालबोट लागले.
अहमदनगर (प्रतिनिधी)- ढोल ताश्यांचा निनाद, पारंपरिक वाद्यांचा सूर, पारंपरिक पोशाख व फुलांची उधळण करत भावपूर्ण वातावरणात नगर शहरासह जिल्हाभरात विघ्नहर्त्या गणरायाला निरोप देण्यात आला. संगमनेर, राजूर, कोपरगाव येथील हाणामारीच्या घटनांनी गालबोट लागले. नगर, राहुरी, श्रीरामपूर, अकोले, राहाता, नेवासा, शेवगाव तसेच ठिकठिकाणी गणरायांची मिरवणूक काढण्यात आली होती. ग्रामीण भागातही उत्साह होता. गणपती बाप्पा मोरया, पुढच्या वर्षी लवकर या च्या गजरात श्रीगणेशाला निरोप देण्यात आला. पुणतांब्यात पावसाने हजेरी लावल्याने पावसात चिंब होत पुणतांबेकरांनी जल्लोषात निरोप दिला.

राज्यातील 40 हजार प्राध्यापकांचे आजपासून बेमुदत काम बंद आंदोलन

0

महाविद्यालये व विद्यापीठांचे कामकाज ठप्प होण्याची शक्यता

पुणतांबा (वार्ताहर) – राज्यातील वरिष्ठ महाविद्यालयातील तसेच विद्यापीठीय शिक्षक आपल्या विविध मागण्यांकडे राज्य सरकारचे लक्ष वेधण्यासाठी आज 25 सप्टेंबरपासून बेमुदत काम बंद आंदोलन करणार असल्याची माहिती प्राध्यापक महासंघाचे महासचिव डॉ. एस. पी. लवांडे, एस पुक्टोचे सरचिटाणिस प्रा. डॉ. के. पी. गिरमकर यांनी दिली आहे. प्राध्यापकांच्या विविध मागण्यांकडे लक्ष वेधण्यासाठी प्राध्यापकांनी बेमुदत काम बंद आंदोलनाचा निर्णय घेतला आहे. मात्र प्राध्यापक महासंघाने मुंबई येथे 17 जून रोजी घेतलेल्या राज्य कार्यकारिणीच्या बैठकीत टप्प्याटप्प्याने आंदोलन करण्याचा निर्णय जाहीर केला होता.

मागण्यांचे व आंदोलनाचे पत्रक 20 जून रोजी राज्य सरकारला दिले होते. शासनाकडून अद्यापही सकारात्मक प्रतिसाद नसल्यामुळे नाईलाजाने आजपासून बेमुदत काम बंद आंदोलन करण्यात येणार आहे चर्चेनुसार प्रश्न सुटू शकतात. मात्र, शासन चर्चेलाच तयार नाही. त्यामुळे राज्यातील 40 हजार प्राध्यापक 100 टक्के आंदोलनात सहभागी होणार आहेत. त्यामुळे राज्यातील महाविद्यालये व विद्यापीठे यांची कामे ठप्प होणार आहेत. त्यास शासन जबाबदार राहणार आहे. पुणे विद्यापीठाअंतर्गत 4500 प्राध्यापक व अहमदनगर जिल्ह्यातील 1150 प्राध्यापक या आंदोलनात सहभागी होणार आहेत. सेवानिवृत्तीजवळ आलेल्या प्राध्यापकांनी सुध्दा सहभागी व्हावे, असे आवाहन डॉ. के.पी. गिरमकर व माजी सहसचिव प्रा. डॉ. बखळे यांनी केले आहे.

आज शिक्षण मंत्र्यांसमवेत बैठक
आज दुपारी 3 वाजता शिक्षणमंत्री विनोद तावडे यांच्या उपस्थितीत शिक्षक संघटना पदाधिकार्‍यांची बैठक आयोजित करण्यात आली आहे. त्यात काय निर्णय होतो यावर सर्वकाही अवलंबून आहे.

एक विचाराने राहून विकास साधणे हीच बापूंना श्रद्धांजली : शरद पवार

0
राष्ट्रवादीचे खासदार शरद पवार यांनी नागवडे कुटुंबाची सांत्वनपर भेट घेतली.
श्रीगोंदा, लिंपणगाव (तालुका प्रतिनिधी) – बापू सदैव ऊस उत्पादक शेतकर्‍यांच्या हिताचा विचार मांडत असत. काळ्या आईशी ईमान राखणार्‍या शेतकर्‍यांशी बापूंची बांधिलकी होती. बापूंचे विचार आणि आदर्श मनाशी बाळगत समाजाचा व परिसराचा सर्वांगीण विकास साधणे ही सर्वांची नैतिक जबाबदारी असून त्यासाठी एक विचाराने राहून सर्वांगीण विकास साधणे हीच बापूंना खरी श्रद्धांजली ठरेल, अशी भावना राष्ट्रवादीचे सर्वेसर्वा खासदार शरद पवार यांनी व्यक्त केली.

रविवारी सकाळी खा. शरद पवार यांनी वांगदरी येथे नागवडे कुटुंबाची सांत्वनपर भेट घेतली. खा. पवार म्हणाले, ‘बापूं’नी सहकारी संस्थांमध्ये कामाचा आदर्श सर्वांसमोर ठेवला, तो जतन करणे गरजेचे आहे. बापूंचे मार्गदर्शन हा सगळ्यांचा मोठा आधार होता. त्यांना राज्यातील सहकारी कारखानदारीचे नेतृत्व करण्याची संधी मिळाली. बापू आमदार राहुलच्या पाठीशी खंबीरपणे उभे राहिले, त्यामुळे राहुलला संधी मिळाली. बापूंची पुढची पिढी अनुराधा व राजेंद्र नागवडे समाजात चांगले काम करीत आहेत. बापूंच्या जाण्याने त्यांचा आधार तुटला आहे.
नागवडे कुटुंबीयांना साथ देणे ही आमदार राहुल आणि सर्व कार्यकर्त्यांची जबाबदारी आहे. खा. पवार म्हणाले, बापूंच्या अंगात प्रचंड इच्छाशक्ती होती.

ते आजारपणातून बाहेर पडतील अशी सर्वांना आशा होती, मात्र सर्व काही तुमच्या आमच्या हातात नसते. बापूंनी दाखवलेल्या आदर्श मार्गाने मार्गक्रमण करून समाजाचा व परिसराचा सर्वांगीण विकास साधणे हीच बापूंना खरी श्रद्धांजली ठरेल, त्यांचे सर्वांशी सुसंवाद व विचारविनिमय केलेले काम आयुष्यभर स्मरणात राहील, अशी भावना खासदार शरद पवार यांनी व्यक्त केले. रविवारी दिवसभरात आमदार मोनिका राजळे, आमदार बाळासाहेब मुरकुटे, साई संस्थानचे उपाध्यक्ष चंद्रशेखर कदम, साखर संघाचे उपाध्यक्ष श्रीराम शेटे, माजी आमदार दादाभाऊ कळमकर, माजी आमदार अशोक पवार, अरुण कडू, प्रताप ढाकणे, शेतकरी संघटनेचे अध्यक्ष अनिल घनवट, राष्ट्रवादीचे जिल्हाध्यक्ष राजेंद्र फाळके, जिल्हा परिषदेचे मुख्याधिकारी विश्वजित माने, जगन्नाथ भोर, आनंद कदम, प्रांजल शिंदे, रमेश खाडे, कैलास तांबे आदींनी नागवडे कुटुंबाची भेट घेऊन सांत्वन केले.

खा. पवार यांचे नागवडे निवासस्थानी आगमन झाल्यानंतर त्यांनी स्वर्गीय बापूंच्या प्रतिमेस पुष्पांजली वाहिली. या प्रसंगी पत्नी कौशल्यादेवी नागवडे, पुत्र राजेंद्र नागवडे, व दीपक नागवडे, मुली मंगलताई, मीनाक्षी, शीतल, शैलेजा, सून अनुराधा नागवडे व ज्योती नागवडे, सर्वच नागवडे परिवारातील सदस्यांचे सांत्वन केले. यावेळी आमदार राहुल जगताप, आमदार मोनिका राजळे, प्रतापराव ढाकणे, राष्ट्रवादीचे जिल्हाध्यक्ष राजेंद्र फाळके, कॉगे्रसचे जिल्हाध्यक्ष अण्णासाहेब शेलार, माजी आमदार चंद्रशेखर कदम, माजी आमदार दादाभाऊ कळमकर, आदींसह तालुक्यातील विविध संस्थांचे पदाधिकारी, अधिकारी, कामगार, तसेच नागवडे कारखान्याचे उपाध्यक्ष केशवराव मगर व संचालक उपस्थित होते.

Social Media

26,177FansLike
5,154FollowersFollow
1,151SubscribersSubscribe
error: Content is protected !!