ञ्यंबकेश्वर येथे देवदिवाळीसाठी देवस्थान ट्रस्ट सज्ज

0

ञ्यंबकेश्वर विशेष प्रतिनिधी : ञ्यंबकेश्वर येथे पुर्वपार चालत आलेल्या परंपरेनुसार देवदिवाळी साजरी करण्यासाठी देवस्थान ट्रस्ट सज्ज झाले आहे. यावर्षी रथोत्सवास 160 वर्ष पुर्ण होत आहेत. दिवाळी पासूनच मंदिरास आकर्षक विद्युत रोषनाई करण्यात आली आहे.

वैकुंठ चतुर्दशी व कार्तिक पौणिर्मानिमीत्त शतकोत्तरी रथोत्सव आणि अन्य धार्मिक कार्यक्रमांचे आयोजन करण्यात आले आहे. दिनांक 21 नोव्हेंबर 2018 बुधवार रोजी वैकुंठ चतुर्दशीच्या दिवशी सरदार विंचुरकरांच्या वतीने देवस्थानतर्फे महापूजा दुपारी 1.30 ते 4.00 वाजे पर्यंत राहील. त्याच दिवशी रात्री 10.00 तप उत्तररात्री 1.00 वाजेपर्यंत वैकुंठीची विशेष महापूजा, पालखी सोहळा व हरिहर भेट असेल. त्याच प्रमाणे दि.22 नोव्हे.2018 गुरूवार रोजी दुपारी 3.30 वाजता रथोत्सवास सुरूवात होणार आहे. श्री ञ्यंबकराजांची रथातुन सवाद्य मिरवणूक कुशावर्त तिर्थावर महापूजा व साधरणत: 6 वाजोपासून मंदिरात परतीचा प्रवास असा कार्यक्रम आहे. रात्री 8 वाजता रथ पालखी मंदिरात परत आले नंतर दिपमाळ पूजन होणार आहे.

ञ्यंबकेश्वर देवस्थान ट्रस्टने याबाबतची सर्व तयारी पुर्ण केली आहे. या कालावधीत दर्शनार्थी भाविकांची गर्दी होईल म्हणून पुर्वदरवाजा दर्शनबारी मंडप देण्यात आला आहे. या दर्शनबारीतील भाविकांना गर्भगृहातील पुजा दर्शन व्हावे म्हणून डिस्ल्पे स्कीन वॉल सुरू करण्यात आला आहे. पिण्याच्या पाण्याची व्यवस्था करण्यात आली आहे. उत्सवाचे प्रमुख आकर्षण असलेला सरदार विंचुरकर यांनी दिलेला 31 फुट उंच असलेला शिसवी लाकडाचा रथ सज्ज करण्यात आला आहे. या रथाची किरकोळ डागडुजी करण्यात आली आहे.

विश्वस्त मंडळाचे अध्यक्ष न्या.बोधनकर, सचिव डॉ चेतना केरूरे, विश्वस्त सौ तृप्ती धारणे, ऍड द्वारकाधिश दिघे, ऍड पंकज भुतडा, संतोष कदम, प्रशांत गायधनी, दिलीप तुंगार, मुख्यकार्यकारी अधिकारी राधाकृष्ण जोशी, प्रशासकीय अधिकारी समीर वैद्य आदिंसह अधिकारी व कर्मचारी यांनी नियोजन पुर्ण केले आहे. अधिकाधीक भाविकांनी या शेकडो वर्षांच्या परंपरेच्या उत्सवाचा लाभ घ्यावा असे आवाहन समितीमार्फत करण्यात आले आहे.

चिमूकलीने वाचविले जखमी बगळ्याचे प्राण

0

पारनेर (तालुका प्रतिनिधी)-  नगर- पुणे महामार्गावरिल पारनेर तालुक्यातील पळवे खुर्द येथिल मठ वस्तीवर एक बगळा हा पक्षी पाण्याच्या शोधात घरासमोर असलेल्या पाण्याच्या टाकीजवळ आला होता. यावेळी मांजरीने बंगल्यावर हल्ला करत बंगल्यास जखमी केले.

यावेळी चौथी मध्ये शिक्षण घेणाऱ्या समृद्धी तरटे या चिमुकलीने गंभीर जखमी झालेल्या बगळ्याला पाहिले. तिने तात्काळ वडिलांच्या मदतीने वनविभागाचे कर्मचारी बाळासाहेब पाचारणे यांना बोलावून बगळ्याला त्यांच्या स्वाधीन केले. त्यानंतर डॉक्टारांनी प्राथमिक उपचार करून बगळ्याला वनविभागाकडे सुपूर्त केला. चिमूकली समृध्दी तरटे हिने आपले धाडस दाखवून बगळ्याचे प्राण वाचविल्याबद्दल तिचे वन्यप्रेमी व ग्रामस्थांनी कौतूक केले आहे.

नगर टाइम्स ई-पेपर : सोमवार, 19 नोव्हेंबर 2018

0

विद्युत रोहित्राच्या स्फोटाने द्राक्षबागेचे नुकसान

0

वडनेर भैरव : येथील सनराईज शाळेच्या मागे पाचोरकर वस्तीजवळील विद्युत रोहित्राचा स्फोट होऊन येथील दत्तात्रेय धोंडीराम पाचोरकर यांचे द्राक्षबागेचे सुमारे सव्वासे झाडे जळून सुमारे दीड लाख रुपयाचे नुकसान झाले आहे. रोहित्राच्या बाजूला लागुनच चिंचेचे झाड आहे. आगीचे लोट झाडावर पडल्यामुळे झाड जळाले. सुदैवाने जीवितहानी टळली आहे.

रविवार रोजी रोहित्र क्र.२७ चा मोठा स्फोट झाला, स्फोटाचा आवाज इतका मोठा होता कि ३ किलोमीटर पर्यंत नागरिकांमध्ये घाबरट निर्माण झाली होती. स्फोटामुळे शेजारील द्राक्षबागेचे सुमारे सव्वासे झाड, ३ आंब्याचे झाड, १ सीताफळीचे झाड, चिंचेचे एक झाड जळाले आहे. यातून पाचोरकर यांचे सुमारे दीड लाख रुपयाचे नुकसान झाले आहे. महावितरणच्या कारभारावर शेतकऱ्यांनी नाराजी व्यक्त केली आहे.

सहा महिन्यांपूर्वी काल स्फोट झालेला ट्रान्सफार्मर लावण्यात आला होता. तेव्हापासून त्यात मोठा आवाज व्हायचा अनेकदा निदर्शनास आणून देवून देखील रोहित्र बदलले नाही. घटनेची दखल घेवून तात्काळ रोहित्र देवून शेतकऱ्यांची गैरसोय टाळावी अशी मागणी पंचायत समिती उपसभापती अमोल भालेराव यांनी केली आहे.

नॅचरल गॅस : भारतीयांना स्वस्त, शुद्ध इंधनाचा सुरक्षित पर्याय

0

देशदूत डिजिटल विशेष

स्वच्छ इंधन योजनेअंतर्गत भारत सरकार येत्या गुरुवारी महत्वपूर्ण टप्पा पार पाडत आहे. शहरी गॅस पुरवठा योजनेचा शुभारंभ पंतप्रधान नरेंद्र मोदी यांच्या हस्ते गुरुवारी होणार असून यामाध्यमातून देशातील १७४ जिल्ह्यांत पाईपलाईनद्वारे नॅचरल गॅसचा पुरवठा सुरु होणार आहे.  शुद्ध, स्वस्त, सुरक्षित गॅस नागरिकांना पुरवण्याचे स्वप्न साकारले जाणार आहे.

गॅस इकॉनॉमी बदलून टाकणारा एक ऐतिहासिक प्रकल्प पंतप्रधान नरेंद्र मोदी यांच्या नेतृत्वाखाली भारत सरकारने हाती घेतला आणि त्याची फलश्रुती आता दिसायला लागली आहे.

गुरुवारी शहरी गॅस पुरवठा प्रकल्पाचा शुभारंभ पंतप्रधान नरेंद्र मोदी यांच्या हस्ते राजधानी दिल्लीतून होत आहे. यानिमित्ताने देशातील ४ जिल्ह्यांत पाईपलाईनद्वारे घराघरात शुद्ध, स्वस्त, सुरक्षित नॅचरल गॅस पुरवण्याच्या स्वप्नपूर्तीची पायाभरणी केली जाणार आहे.

नॅचरल गॅसचा वापर वाढला तर वाढते प्रदूषण कमी होईल. पेट्रोल, डीझेलवरचे अवलंबित कमी होईल. देशाचा महसूल वाचेलच पण अपघातांचे प्रमाणही कमी होणार आहे. ग्राहकांना घरपोच स्वस्त आणि शाश्वत पुरेसा गॅस पुरवठा करण्याचा मार्ग मोकळा होईल. वाहनचालकांना पेट्रोल डीझेलच्या तुलनेत अवघ्या २५ ते ३० टक्के खर्चात आपली इंधनाची गरज पूर्ण करता येईल. नॅचरल गॅसची उपयुक्तता देशासाठी इतकी आहे की, सीएनजी, पीएनजी वापरासाठी जनआंदोलन उभे करण्याची गरज आहे असे मत पेट्रोलियम मंत्री धर्मेंद्र प्रधान यांनी व्यक्त केले.

कार्बन डाय ऑक्साइड प्रदूषण २०३० पर्यंत ३० टक्के कमी करण्याचे लक्ष्य पंतप्रधान नरेंद्र मोई यांनी ठेवले आहे. यासाठी सध्या सहा टक्के असलेला नॅचरल गॅसचा वापर किमान १५ टक्क्यांपर्यंत नेण्याचा त्यांचा प्रयत्न आहे.

याचाच भाग म्हणून केंद्र सरकारने शहरी गॅस पुरवठा योजना आखली आहे. घरगुती वापरासाठी पीएनजी आणि वाहनांसाठी कॉम्प्रेस्ड गॅस (सीएनजी) पोहोचविण्याचा प्रकल्प युद्धपातळीवर हाती घेण्यात आला आहे.

महाराष्ट्राने या प्रकल्पात आघाडी घेतली आहे. नॅचरल गॅसचा वापर करण्यामध्ये मुंबई, दिल्लीपेक्षा महाराष्ट्रातील पुणे आघाडीवर आहे. हे विशेष प्रदूषण कमी करण्यासाठी पुणेकरांनी नॅचरल गॅ  सची वाट    धरली आहे. पुण्यात आजमितीला १२०० शहर बसेस, १ लाख ८०   हजार कार, ५० हजार रिक्षा, एक लाख २५ हजार घरगुती ग्राहक, पाच हजार सोसायटी पाईपलाईनद्वारे सीएनजी गॅस वापरला जात आहे. त्यामुळे पुण्याचे प्रदूषण घटण्यास मदत झाली आहे.

महाराष्ट्राचे मुख्यमंत्री देवेंद्र फडणवीस यांच्या मार्गदर्शनाखाली एमएनजीएल, भारत गॅस रिसोर्सेस लिमिटेडचे (बीजी  आरएल) अधिकारी संचालक आता हे अभियान उर्वरित महाराष्ट्रात घेऊन जात आहेत. महाराष्ट्रातील सात जिल्ह्यांचे काम या दोन कंपन्या करीत आहेत.

एमएनजीएलकडे नाशिक, धुळे, सिंधुदुर्ग या तीन जिल्ह्यांची तर बीजीआरएलकडे औरंगाबाद, सातारा, सांगली, अहमदनगरची जबाबदारी आहे. गुरुवारी या शहरांच्या नॅचरल गॅस सेवेचे उद्घाटन पंतप्रधान मोदी यांच्या हस्ते होत आहे.

त्यामुळे लवकरच या शहरांमध्ये पाईपलाईनद्वारे नॅचरल गॅस घराघरांत पोहोचणार आहे. या सेवेचा विस्तार करण्याची क्षमता आणि पायाभूत सुविधा आहे. पुढील किमान २० वर्ष पुरेल इतकी गॅस उपलब्धता आहे. मोठी गुंतवणूकही करण्याची कंपन्यांची तयारी आहे. फक्त नागरिकांच्या आणि स्थानिक संस्थांच्या सहकार्याची गरज आहे.

‘सीएनजी’चे फायदे

  • वाहनांच्या पारंपारिक द्रवरूप इंधनापेक्षा सीएनजी स्वस्त आणि पर्यावरणपूरक आहे.
  • सीएनजी कमी किंमतीत अधिक कार्यक्षमता मिळवून देतो त्यामुळे वाहनाचे मायलेज वाढण्यासाठी मदत होते.
  • सीएनजी क्रॅक केस ऑईल दुषित किंवा पातळ / सौम्य करत नाही त्यामुळे इंजिनचे आयुष्य वाढविण्यासाठी मदत मिळते.
  • सीएनजी कार्बनडायऑक्साईड, कार्बन मोनोक्साईड व इतर सास्पेन्देद कण यांसारख्या अपायकारक उत्स्र्जकांचे प्रमाण कमी करते.
  • जागतिक तापमान वाढीचे परिणाम कमी करून सीएनजी पर्यावरण संरक्षण करते.
  • सीएनजी हेवेपेक्षा हलका असल्याने तो कोठेही साठून न राहता वातावरणात मिसळतो.

‘पीएनजी’चे फायदे

  • पाईपलाईन घरात आल्यामुळे सोयीस्कर
  • सुरक्षित
  • महिलांसाठी स्वयंपाकाचा स्वस्त पर्याय
  • पुन्हा भरून घेणे, नोंदवणे, वाट पाहणे, सिलेंडर बसवणे यापासून सुटका
  • अनुदानित एलपीजीपेक्षा स्वस्त
  • शेवटच्या क्षणी होणारी धावपळ नाही
  • चोरी, कमतरता, वाया जाने नाही

ऑनलाईन कटकटीचा एण्ड

0

अहमदनगर (प्रतिनिधी)- ऑनलाईन अर्ज भरण्यास येत असलेल्या तांत्रिक अडचणीची दखल अखेर राज्य निवडणूक आयोगाने घेतली आहे. हाताने लिहिलेले उमेदवारी अर्ज स्वीकारण्याचा निर्णय आयोगाने आज घेतला. तसे तोंडी आदेश जिल्हा प्रशासनाला प्राप्त झाल्याची माहिती कलेक्टर राहुल द्वीवेदी यांनी ‘नगर टाइम्स’शी बोलताना दिली.

13 तारखेपासून उमेदवारी अर्ज दाखल करण्यास सुरूवात झाली. उद्या म्हणजेच 20 तारखेला अर्ज दाखल करण्याचा शेवटचा दिवस आहे. दरम्यान ऑनलाईन अर्ज भरण्यासाठी एकाचवेळेस अनेकांच्या उड्या पडत असल्याने सर्व्हेर अप-डाऊन होत असल्याच्या तक्रारी आयोगाकडे करण्यात आल्या होत्या. खासदार दिलीप गांधी, माजी आमदार अनिल राठोड, अ‍ॅड प्रसन्ना जोशी, शाकीर शेख यांच्या लिखित तक्रारी गेल्यानंतर आयोगाची तातडीची बैठक मुंबईत झाली. या बैठकीत कोणी इच्छुक निवडणुकीपासून वंचित राहणार नाही यासाठी राज्य निवडणूक आयोगाने हाताने लिहिलेले अर्ज स्वीकारण्याचा निर्णय घेतला. तसे तोंडी आदेश जिल्हा प्रशासनाला प्राप्त झाले असून लेखी आदेशही मिळतील अशी माहिती कलेक्टर राहुल द्विवेदी यांनी दिली.

आयोगाच्या या निर्णयामुळे इच्छुकांनी सुटकेचा निश्वास सोडला आहे. ऑनलाईनच्या कटकटीतून सुटका झाल्याने अर्ज भरण्यासाठी आता उद्या पडणार आहे. उद्या अखेरचा दिवस असल्याने निवडणूक कार्यालयात झुंबड उडणार आहे.

जमलं बुवा एकदाचं!

0

जागा वाटपाची रस्सीखेच

अहमदनगर (प्रतिनिधी) – महापालिका निवडणुकीसाठी आघाडीच्या चर्चेचे गुर्‍हाळ काल संपुष्टात आले. काँग्रेसचे युवा नेते डॉ. सुजय विखे पाटील आणि राष्ट्रवादीचे आ. संग्राम जगताप यांच्या संयुक्त पत्रकार परिषदेत रविवारी सायंकाळी उशिरा राष्ट्रवादी 43 काँग्रेसला 25 असा फॉर्म्युला जाहीर करण्यात आला. मात्र कोणत्या वार्डात, कोणत्या जागेवर कोण लढणार याचा तोडगा सायंकाळपर्यंत निघाला नव्हता. जागा वाटपाचा घोडं आडलं असून उद्याच त्यावर मार्ग निघेल असं सूत्रांकडून सांगण्यात आलं.

राष्ट्रवादीच्या कोट्यातून अशोक गायकवाड यांच्या युनायटेड रिपब्लीकनला 3 आणि काँग्रेसच्या कोट्यातून भारतीय कम्युनिस्ट पक्षाला तीन जागा देण्यात आल्या आहेत. युनायटेड पक्षाला निवडणूक चिन्ह नसल्याने ते राष्ट्रवादीचे घड्याळ हातात बांधून निवडणूक रिंगणात उतरणार असल्याचे सांगण्यात आले. पक्षाचे अशोक गायकवाड यांनीही त्याला दुजोरा दिला. तर भाकप विळाकणीस या स्वतंत्र चिन्हावर निवडणूक लढणार आहे.

महापालिका निवडणुकीत दोन्ही काँग्रेसच्या आघाडीची घोषणा राष्ट्रवादीचे ज्येष्ठ नेते दादा कळमकर यांनी केली. आमदार संग्राम जगताप, युवा नेते डॉ. सुजय विखे पाटील, शहरजिल्हाध्यक्ष प्रा. माणिक विधाते, रेश्मा आठरे, सुनील कोतकर, अभिजित खोसे यावेळी उपस्थित होते.काँग्रेसला 31 जागांची अपेक्षा असल्याचे डॉ. विखे याांनी सांगितले, मात्र विनाकारण जागांची संख्या वाढविण्यापेक्षा जेवढ्या जागा जिंकता येणे शक्य आहेत, तेवढ्या जागा काँग्रेसने घेतलेल्या आहेत. विनाकरण हट्ट धरण्यापेक्षा मनपात आघाडीची सत्ता आणण्यासाठी काँग्रेसने हा निर्णय घेतला आहे. मनपा निवडणुकीसाठी दोन्ही पक्षांच्या तीन वेळेस मैत्रीपूर्ण बैठका झाल्या त्यातून हा निर्णय झाला आहे.

आघाडीचा फॉर्म्युला तयार झाला असला तरी जागा वाटपाचं घोडं मात्र आडलं आहे. आयोगाच्या या निर्णयामुळं इच्छुकांनी सुटकेचा निश्वास सोडला आहे. ऑनलाईनच्या कटकटीतून सुटका झाल्याने अर्ज भरण्यासाठी आता उड्या पडणार आहे. उद्या अखेरचा दिवस असल्याने निवडणूक कार्यालयात झुंबड उडणार आहे.

‘वन वे’चा दावा
दादाभाऊ कळमकर यांनी महापालिका निवडणुकीत डॉ. विखे आणि आ. जगताप नेतृत्व करणार असल्याचे जाहीर केले. महापालिकेवर आघाडीचा झेंडा फडकणार असून सत्तेसाठी अपक्षांची गरजही भासणार नाही. महापालिकेत आघाडीची वन वे सत्ता येईल असा दावाही कळमकर यांनी केला.

 

भाऊ-अप्पांमध्ये धुमशान?

0

दोन दिग्गज समोरासमोर देण्याच्या हाल‘चाली’

सावेडी (वार्ताहर) – महानगरपालिका निवडणुकीत काही लढती चुरशीच्या होणार असून त्या कोणत्या याची उत्सुकता नगरकरांना लागून आहे. शिवसेनेच्या युवराजाचा ‘बाण’ रोखण्यासाठी भाजपने ‘भाऊ अस्त्र’ बाहेर काढण्याचा निर्णय घेतल्याची माहिती सूत्रांनी दिली. चार नंबर वार्डात दोन जागा खुल्या असल्याने हे दोघे समोरासमोर येतात की कसं? याकडे अनेकांचे लक्ष लागून आहे.

शिवसेनेने 18 उमेदवारांची पहिली यादी जाहीर केली. त्यात शिवसेनेचे युवराज योगीराज गाडे यांचा नंबर लागला. ते शिवसेनेचे जिल्हाप्रमुख शशिकांत गाडे यांचे चिरंजीव आहे. विद्यमान नगरसेवक असल्याने अन् तिकिट घोषीत झाल्याने त्यांनी वार्डात प्रचाराला जोर दिला. भाजपने अवघ्या 15 उमेदवारांची यादी जाहीर केली आहे. एकास एक लढती फायनल करताना अन् शिवसेनेच्या दिग्गजांची कोंडी करण्याची हाल‘चाल’ आखली आहे. त्याचाच भाग म्हणून योगीराज गाडे यांच्या विरोधात विद्यमान नगरसेवक स्वप्नील(भाऊ) शिंदे यांचे नाव जवळपास फायनल केल्याची माहिती सूत्रांनी दिली.

शिंदे यांनी महापालिका निवडणुकीच्या तोंडावरच भाजप प्रवेश केला आहे. त्यांचा वार्डातील जम बघता भाजपने हा निर्णय घेतल्याचे सांगण्यात आले. शिवाय शिंदे यांच्यामुळे शिवसेनेच्या गाडेंची कोंडी होणार आहे. युवराजाच्या विजयासाठी स्वत: गाडेसरांना वार्डात गुंतवले तर त्यांचे शहरातील इतर वार्डाकडे दुर्लक्ष होईल, त्याचा फायदा भाजपला होईल असंही समीकरण त्यामागं असल्याचे सूत्रांकडून समजले. वार्डात दोन जागा (क,ड) खुल्या असल्याने योगीराज गाडे कोणत्या जागेवर लढणार अन् त्यांच्यासमोर स्वप्नील शिंंदे येतात की कसं याकडे नगरकरांचं लक्ष लागून आहे.

दादांची काटमारी

0

कोअर कमिटीत ओढाताण इच्छुकांची दातखिळी

अहमदनगर (प्रतिनिधी) – महापालिकेवर सत्तेचा झेंडा फडकविण्यासाठी निघालेल्या भाजपकडं एका जागेसाठी दोन-दोन दिग्गज दावेदार असल्याने कोअर कमिटी गोंधळात पडली. तिकिटाचा तिढा सोडविण्यासाठी यादी थेट दानवेदादांकडे पोहोचली. दादांनी एकावर काट मारत अंतिम यादी फायनल केली. आता दादांच्या हातसफाईने कोणावर खाट पडली अन् कोण खाटेवर बसलं याची उत्सुकता नगरकरांना लागून आहे.

महापालिका निवडणूक तिकिटासाठी भाजपकडे तब्बल 267 जणांनी हजेरी लावली. तिकिट वाटपासाठी पक्षाने पालकमंत्री राम शिंदे, आ. सुरजितसिंह ठाकूर, प्रदेशचे रघुनाथ कुलकर्णी, खा. दिलीप गांधी, अभय आगरकर, सुनील रामदासी, किशोर बोरा, जिल्हाध्यक्ष भानुदास बेरड यांची कोअर कमिटी केली. या कमिटीसमोर इच्छुकांनी शक्तीप्रदर्शन करत मुलखती दिल्या. त्यानंतर भाजपने 15 उमेदवारांची पहिली यादी जाहीर केली.

अद्याप दुसरी यादी मात्र जाहीर झालेली नाही. उमेदवारी अर्ज दाखल करण्याला केवळ सहा तासाचा अवधी शिल्लक राहिलेला असताना तिकिट डिक्लिअर होत नसल्याने इच्छुकांचा जीव खाली-वर होत आहे. अनेक इच्छुकांनी रविवारी खा. दिलीप गांधी आणि कोअर कमिटीचे डोकं खाल्लं! कोअर कमिटीने यादी फायनल केली आहे. अर्ध्या तासात जाहीर होईल असं सांगून या इच्छुकांची समजूत काढली जात होती. प्रत्यक्षात 24 तास उलटल्यानंतरही यादी जाहीर झालेली नाही.
सूत्रांच्या माहितीनुसार तिकिट वाटपात बहुतांश जागांवर कोअर कमिटीच्या सदस्यांत एकमत होत नव्हते. त्यामुळं गुंतागुंतीची यादी थेट प्रदेशाध्यक्ष रावसाहेब दानवेदादांकडे पाठविण्यात आली.

नगर भाजपचे काही लोक ही यादी घेऊन दादांना औरंगाबादला भेटले. दादांनी यादीवर नजर टाकून हात‘सफाई’ केली. त्यानंतरही यादी डिक्लिअर झाली नाही. त्यामुळं यादी नेमकी लटकली कुठं? या विचाराने तिकिटाकडे डोळे लावून बसलेल्यांची घालमेल सुरू आहे. तिकिटासाठी अनेकांनी फिल्डिंग लावली. कोणी संघामार्फत तर कोणी थेट प्रदेश नेत्यांमार्फत फोनफोनी करून तिकिटाची गळ घालत आहे.

कोअर कमिटीत कोणतीही ओढताण नाही. विरोधकांच्या रणनीतीचा अंदाज घेताना यादीला विलंब झाला. विरोधकांच्या तोडीस तोड उमेदवार देण्याकरीता भाजपची ही स्टॅ्रॅटीजी आहे. यादी फायनल झाली असून ती आज डिक्लीअर होईल.
– सुरजितसिंह ठाकूर,
आमदार तथा निरीक्षक

तीन विद्यमानांची धाकधूक
भाजपच्या यादीत नंदा कुलकर्णी, स्वप्नील शिंदे आणि मनिषा काळे-बारस्कर या तीन विद्यमान नगरसेवकांची धाकधूक सुरू आहे. पहिल्या यादीत या तिघांनाही स्थान मिळालेले नाही. यात गायत्री कुलकर्णी या 13 नंबरमधून इच्छुक आहेत. सहा नंबरमधून मनिषा काळेंचे मिस्टर राजेंद्र काळे स्वत:च इच्छुक आहेत. स्वप्नील शिंदे यांनी निवडणुकीच्या तोंडावर भाजप प्रवेश केला. तेही चार नंबरमधून रेसमध्ये आहेत. मात्र तिघांचेही तिकिट अजून फायनल झालेले नाही.

गुरुवारी पंतप्रधान मोदी साधणार नाशिककरांशी संवाद

0
file photo
नाशिक | स्वच्छ इंधन योजनेअंतर्गत भारत सरकार महत्वपूर्ण टप्पा पार पाडत आहे. याच योजनेचा एक भाग म्हणून शहरी गॅस पुरवठा योजनेचा शुभारंभ पंतप्रधान नरेंद्र मोदी यांच्या हस्ते दिल्लीतून होत आहे. यावेळी मोदी नाशिककरांशी संवाद साधणार आहेत.

नाशिक शहराचाही या योजनेत समावेश असून नाशिकमधील उद्घाटन कार्यक्रम येत्या गुरुवारी (दि.२२) रोजी दुपारी तीन वाजता रावसाहेब थोरात सभागृहात पार पडेल.

यावेळी केंद्रीय संरक्षण राज्यमंत्री डॉ. सुभाष भामरे, राज्याचे जलसंपदा मंत्री आणि नाशिकचे पालकमंत्री गिरीश महाजन, विभागीय आयुक्त राजाराम माने, जिल्हाधिकारी बी. राधाकृष्णन, खासदार हेमंत गोडसे, आमदार बाळासाहेब सानप, देवयानी फरांदे, सीमा हिरे व योगेश घोलप यांची प्रमुख उपस्थिती असणार आहे.

या शुभारंभ कार्यक्रमात व्हिडीओ कॉन्फरन्स होणार असून यावेळी पंतप्रधान नरेंद्र मोदी उपस्थितांना संबोधित करणार आहेत.

Social Media

26,915FansLike
5,154FollowersFollow
1,361SubscribersSubscribe
error: Content is protected !!