शिर्डीत करोना रुग्णांसाठी उपचार व्यवस्था उपलब्ध करावी – गोंदकर

शिर्डी |शहर प्रतिनिधी| Shirdi

राज्यातील क्षेत्रफळाच्या दृष्टीने सर्वात मोठ्या असलेल्या नगर जिल्ह्यात तसेच आंतरराष्ट्रीय तिर्थक्षेत्र

शिर्डी परिसरातील वाढत्या करोना रूग्णांसाठी उपचार व्यवस्था उपलब्ध करून देण्यासाठी जिल्हा आरोग्य विभागाने तातडीने उपाययोजना कराव्यात, अशी मागणी राष्ट्रवादीचे ज्येष्ठ नेते रमेश गोंदकर यांनी राज्याचे आरोग्यमंत्री राजेश टोपे यांच्याकडे निवेदनाद्वारे केली.

रमेश गोंदकर यांनी नुकतीच मुंबईत आरोग्यमंत्री राजेश टोपे यांची भेंट घेवून नगर जिल्ह्यातील विषेशत: शिर्डी परिसरात वाढत्या करोना रूग्णांबाबत त्यांचे लक्ष वेधले. साईबाबा संस्थान प्रशासनाने करोना रूग्णांसाठी मोठी अद्यावत इमारत उपलब्ध करून दिली असून डॉक्टर, परिचारीका आणि उपचारही सोय करून दिली आहे.

मात्र साईबाबा संस्थानला काही मर्यादा असल्याने राज्य सरकारच्या आरोग्य विभागाने साईसंस्थानच्या कोविड सेंटरमध्ये आवश्यक व्हेंटीलेटर, औषध साठा आणि वैद्यकीय पथक तातडीने उपलब्ध करून देण्याची गरज असल्याचे त्यांनी ना. टोपे यांच्या निदर्शनास आणून दिले.

यावेळी श्री. गोंदकर यांनी केलेल्या सुचनांची ना. राजेश टोपे यांनी गांभीर्याने दखल घेतली असून शिर्डीत साईसंस्थानच्या कोविड रूग्णालयासाठी आवश्यक ती सर्व प्रकारची मदत करण्याबाबतची सुचना वरिष्ठ अधिकार्‍यांना दिल्या आहेत.