Type to search

अग्रलेख संपादकीय

लोकशाहीला पोषक पाऊल

Share
आपापल्या प्रश्नांना वाचा फोडण्यासाठी विविध समाजघटक आणि संघटना छोटे-मोठे मोर्चे नेहमीच काढतात. राजकीय पक्षांचेही मोर्चे निघतात. मोर्चांचे नेतृत्व स्थानिक प्रतिनिधींकडेच असते. अलीकडे मात्र मोर्चांचे नेतृत्व करण्यासाठी राज्य वा राष्ट्रीय पातळीवरील नेतेमंडळी पुढे येत आहेत.

नाशिककरांना त्याचा अनुभव नुकताच आला. दोन दिवसांपूर्वी राष्ट्रवादी काँग्रेसने करवाढ आणि इतर प्रश्नांबाबत मनपावर मोर्चा काढला. मोर्चाचे नेतृत्व माजी उपमुख्यमंत्री छगन भुजबळ यांनी केले. मनपा मुख्यालयासमोर छोटेखानी सभा घेऊन घणाघाती भाषणही दिले. मनपा आयुक्तांना करवाढीबाबत सुनावताना ‘नागरिकांना कायदा हातात घ्यायला भाग पाडू नका’ असा सूचक इशारा दिला.

मनपातील भाजप नगरसेवकांना ‘कणाहीन’ ठरवले. इंधन दरवाढीप्रश्नी सोमवारी काँग्रेसने वीस पक्षांच्या पाठिंब्याने देशव्यापी बंद पाळला. नाशकातही बंद पाळला गेला. दुसर्‍या दिवशी पुन्हा ‘राफेल’ विमान करारासह इतर मुद्यांवर शहर व जिल्हा काँग्रेसने जिल्हाधिकारी कार्यालयावर मोर्चा काढला. मोर्चाचे नेतृत्व अनपेक्षितपणे राज्याचे माजी मुख्यमंत्री पृथ्वीराज चव्हाण यांनी केले.

केंद्रात मंत्रिपद भूषवलेले पृथ्वीबाबा सहभागी झाल्याने मोर्चाला वेगळेच महत्त्व आणि वजन प्राप्त झाले. याआधीसुद्धा अन्य पक्षांची राज्यस्तरीय नेतेमंडळी वेगवेगळ्या कारणाने नाशकात पायधूळ झाडून गेली आहेत. बड्या नेत्यांच्या स्थानिक पातळीवरील मोर्चे-आंदोलनात सहभागी होण्याने सामान्य जनतेला निवडणुकांची चाहूल लागली आहे. कोणत्या का कारणाने होईना; बडी नेतेमंडळी जनहिताशी निगडीत प्रश्नांकडे लक्ष पुरवत आहेत. तळागाळातील कार्यकर्त्यांत मिसळत आहेत. हे दिलासादायक चित्र आहे.

लोकांमध्येसुद्धा राजकीय प्रश्नांबाबत जाणीव निर्माण व्हायला त्यामुळे मदतच होईल. देवाच्या काठीला आवाज नसतो; पण तिचा मार बसतो, असे म्हणतात. लोकशाहीत आम जनता हाच देव असतो. हा देव बोलत नाही. मात्र सत्तालोलूप नेत्यांची सगळी नाटके गुपचूप पाहत असतो. मनातल्या मनात पुढील नेतृत्वाची चाचपणी करतो.

पाच वर्षांतून एकदा येणार्‍या निवडणुकांमध्ये मतदान यंत्रांतून योग्य न्याय करून नेत्यांच्या पाप-पुण्याचे माप त्यांच्या पदरात टाकतो. तरीसुद्धा लोकशाहीच्या या देवाबद्दल बहुसंख्य राजकारणी उदासीन का असावेत? अशा परिस्थितीत लोकशाहीला पूरक भूमिका घेऊ पाहणार्‍या भुजबळ-चव्हाणांसारख्या बड्या नेत्यांचे अनुकरण लवकरच इतरही नेते करताना दिसले तर नवल नाही.

Tags:

You Might also Like

Leave a Comment

Your email address will not be published. Required fields are marked *

*

error: Content is protected !!