शिक्षक आमदारकीसाठी मोर्चेबांधणी : इच्छुक आतापासूनच सक्रिय

0
जिल्ह्याला पुन्हा मिळू शकतो मान..
नगर जिल्ह्यात इतर जिल्ह्याच्या तुलनेत जादा मतदार आहेत. पण प्रत्येकवेळी अनेकजण इच्छुक असल्याने त्याचा फटका बसतो. त्याचा फायदा अन्य जिल्ह्यातील उमेदवार उठवितात. याहीवेळी एकच उमेदवार जिल्ह्यातून दिलातर पुन्हा एकदा आमदारकीची संधी मिळू शकते. 

अहमदनगर (प्रतिनिधी)- येत्या जुलै 2018 मध्ये शिक्षक आमदार अपूर्व हिरे यांचा आमदारकीचा कार्यकाळ संपुष्टात येत असल्याने आतापासून राजकीय पक्ष आणि त्यांच्या इच्छुकांनी मोर्चेबांधणी सुरू केल्याने राजकीय वातावरण तापू लागले आहे. नगर जिल्ह्यातून शिक्षकनेते भाऊसाहेब कचरे यांनी तयारी सुरू केली आहे.

तर धुळ्यात राष्ट्रवादी काँग्रेसचे माजी जिल्हाध्यक्ष, शिरपूर येथील आर.सी.पटेल पॉलिटेक्निक कॉलेजचे प्रा. संदीप बेडसे व ओबीसी शिक्षक-पालक-विद्यार्थी असोसिएशनचे प्रदेशाध्यक्ष, काँग्रेस शिक्षक सेलचे विभागीय सचिव, धुळे येथील म्युनिसिपल हायस्कूलचे ज्येष्ठ शिक्षक विलासराव पाटील या दोघांनीही जोरदार मोर्चेबांधणी केली आहे.

विधान परिषदेत शिक्षक आमदारांचा कार्यकाळ सहा वर्षांचा असतो. नाशिक विभागीय शिक्षक मतदार संघात नाशिक, नगर, जळगाव, धुळे व नंदुरबार ह्या पाच जिल्ह्यांचा समावेश आहे. गतवेळच्या निवडणुकीत अपक्ष उमेदवार डॉ. अपूर्व हिरे यांनी दणदणीत विजय मिळविला होता. त्यांनी शिवसेनेचे संजय चव्हाण, टीडीएफचे डॉ. डी.एन. नांद्रे, टीडीएफच्या दुसर्‍या गटाचे सुधीर लांडे-पाटील याचा पराभव केला.

अपूर्व हिरे यांना एकूण 20 हजार 902 मते तर लांडे-पाटील यांना 12 हजार 474 मते मिळाली होती. डॉ. हिरेंसह अन्य काही जण या जिल्ह्यातून इच्छुक आहेत. या निवडणुकीसाठी अनेकजण इच्छुक असलेतरी शिक्षक संघटनांची व संस्थाचालकांची भूमिका अतिशय निर्णायक असते.

राजकीय पक्ष आपले स्वतंत्र पक्ष पुरस्कृत उमेदवार देतात की शिक्षक संघटनांच्या उमेदवारांच्या पाठीशी भक्कमपणे उभे राहतात हे पाहणेही औत्सुक्याचे ठरेल.यापूर्वी धुळे जिल्ह्यातून माजी शिक्षक आमदार जे. यू. ठाकरे, जळगाव जिल्ह्यातून माजी आमदार दिलीपराव सोनवणे व चौधरी, नाशिक जिल्ह्यातून माजी आमदार नानासाहेब बोरस्ते, नगर जिल्ह्यातून माजी आमदार रा. ह. शिंदे आदींनी प्रतिनिधित्व केले आहे.

सद्या ‘टीडीएफ’सह अन्य शिक्षक संघटनांच्या कार्यकर्त्यांच्या वरिष्ठांसमवेत जिल्हा पातळीवर बैठका होत असून उमेदवारांची चाचपणीही सुरू आहे. त्यातही अन्य उमेदवारांच्या तुलनेत ‘टीडीएफ’चा उमेदवार हा आमदारकीचा प्रमुख दावेदार मानला जातो. परंतु अनेकदा ‘टीडीएफ’मध्येही फूट पडल्याचे व बंडखोरी झाल्याचे उदाहरण सर्वश्रुत आहे. त्यातही पुन्हा अपक्षांची भाऊगर्दी. त्यामुळे अधिकृत उमेदवारी नेमकी कोणाला मिळते याकडे शिक्षकवर्गाचे लक्ष लागून आहे.

 

LEAVE A REPLY

*