पावसाने पाठ फिरवल्याने शेतकरी चिंतीत !

0
कळंबू ता.शहादा । दि.15 । – कळंबूसह परिसरात मान्सुनच्या आगमनाने शेतकर्‍यांमध्ये उत्साहाचे वातावरण होते. परंतु गेल्या आठ दिवसापासून पावसाने पाठ फिरवल्याने बळीराजाची नजर आता आकाशाकडे लागल्याची दिसून येत आहे.
शहादा तालुक्यातील कळंबू परिसरात मृग नक्षत्रात दमदार पावसामुळे पेरणीसाठी व कापूस लागवडीसाठी शेतकर्‍यांनी बियाणे खरेदी करण्यासाठी कृषी केंद्रांवर गर्दी केली होती.
जाणकार शेतकर्‍यांच्या मते मृग नक्षत्रात झालेला पाऊस हा शेवटपर्यंत टिकून राहतो. या आशेने कापसासह मूग, ज्वारी, उडीद, तूर, बाजरी, तीळ आदी पिकांची पेरणी करण्यात आली आहे.
परंतू पेरणी केल्यानंतर पाच ते सहा दिवस उलटले आहेत. जो दिवस उगवतो तो ऊन, वारे वाहून निघून जात असल्याने बळीराजा आणखी एका मोठ्या संकाटाला तोंड द्यावे लागणार आहे. पाऊस लवकर न आल्यास दुबार पेरणीचे संकट येणार की काय या चिंतेने शेतकरी कासावीस झाला आहे.

कळंबूसह कुकावल, कोठली, बोराळे, जयनगर, कोंढावळ, वडाळी परिसरात बर्‍याच शेतकर्‍यांनी कापूस लागवड केले असून उर्वरीत शेतकरी पेरणी करतांना दिसून येत आहेत.

सलग दोन ते तीन वेळा दमदार पाऊस झाल्याने शेतकर्‍यांच्या आशा पल्लवीत झाल्या होत्या. यावर्षी वरूणराजाची आपल्यावर कृपादृष्टी झाली आहे.

या आशेने शेतकर्‍यांचे आनंद गगनात मावेनासे झाल्याची स्थिती निर्माण झाली होती. दमदार पाऊस झाला व जिल्हा अबादानी झाल्याचे चित्र निर्माण झाले होते.

गत दोन वर्षापासून जिल्ह्यात कमी पाऊस झाल्याने विहिरी, बोअरवेलमध्ये जलसाठा पुरेसा शिल्लक राहिला नसल्याने शेतकर्‍यांची स्थिती हलाखीची झाली होती.

यावर्षी वरूणराजाने मृग नक्षत्रातच सरींना सुरूवात करून जोरदार आगमन केले. यामुळे शेतकर्‍यांनी कापूस लागवडीला सुरूवात केली होती.

परंतू गेल्या आठ दिवसापासून पावसाने पाठ फिरवल्याने उर्वरीत शेतकर्‍यांनी कपाशी लागवड लांबवली असल्याने ते पावसाच्या प्रतिक्षेत आहेत.

रोज सकाळी ते दुपारपर्यंत वातावरणात असह्य उकाडा जाणवतो. परंतू सायंकाळी वातावरण मोकळे होत असल्याने बळीराजाच्या पदरी निराशा येवून त्यांच्या नजरा आकाशाकडे खिळल्या आहेत.

पाऊस आठ दिवसात न पडल्यास शेतकर्‍यांवर दुबार पेरणीचे संकट येण्याची शक्यता नाकारता येत नाही.

 

LEAVE A REPLY

*