- जम्मू-काश्मीरमधील शोपियॉं जिल्ह्यात आज पहाटे सुरक्षा दलाने केलेल्या कारवाईत हिज्बुल मुजाहिदीनचे तीन दहशतवादी ठार झाले. यात एका मोस्ट वॉंटेड दहशतवाद्याचा समावेश असल्याची माहिती पोलिस अधीक्षक शाहीद मेहराज यांनी दिली. शोपियॉं जिल्ह्यातील शतधार-नासरपुरा भागात काही दहशतवादी लपल्याची माहिती पोलिसांनी मिळाली होती. त्यानुसार पोलिस आणि सुरक्षा दलाने आज पहाटे संयुक्त मोहीम हाती घेतली. दहशतवादी एका घरात लपून बसल्याचे लक्षात आल्यानंतर या संपूर्ण भागाला वेढा देण्यात आला. दहशतवाद्यांना सुरक्षा दलाने घेरल्यामुळे त्यांनी गोळीबार करण्यास सुरवात केली. सहा तास चाललेल्या धुमश्चक्रीत हिज्बुल चे तीन दहशतवादी ठार झाले. चकमकीत ठार झालेला साकिब आणि त्याचा साथीदार पासवल हे दोघे गेले अनेक वर्षांपासून दहशतवादी कारवायांशी संबंधित होते. अनेक गुन्ह्यांमध्ये ते पोलिसांना हवे होते. चकमकीत ठार झालेल्या तिसर्‍या दहशतवाद्याची ओळख पटलेली नाही. पंतप्रधान उद्या काश्मीर दौर्‍यावर अनंतनाग आणि काझीगुंद यांना जोडणार्‍या लोहमार्गाचे उद्‌‌घाटन पंतप्रधान डॉ. मनमोहनसिंग यांच्या हस्ते होणार आहे. त्यासाठी पंतप्रधान बुधवारी जम्मू काश्मीर दौर्‍यावर येत आहेत. या पार्श्वभूमीवरच तीन दहशतवादी मारले गेल्याने कडक सुरक्षाव्यवस्था तैनात करण्यात येत आहे.