मुंबई, (वृत्तसंस्था) - मतांसाठी प्रचाराचा जोर वाढला आहे. आरोप प्रत्यारोपांच्या फैरी झडायला सुरवात झाली आहे. आपणही बुलटेनची सुरवात करुया अशाच राजकीय आरोपांच्या बातमीने राज ठाकरे म्हणजे पावसाळी बेडूक आहे अशी टीका मुख्यमंत्री अशोक चव्हाण यांनी केली आहे. नांदेडमध्ये पत्रकारांच्या प्रश्नांना उत्तरे देताना त्यांनी मनसे अध्यक्ष राज ठाकरेंवर निशाणा साधला आहे.नांदेड येथे घेतलेल्या पत्रकार परिषदेत मुख्यमंत्र्यांनी विविध प्रश्नांना मोकळेपणाने उत्तर दिली. त्यावेळी राज ठाकरे यांच्यासंदर्भात विचारलेल्या एका प्रश्नाला उत्तर देताना मुख्यमंत्र्यांनी राज यांच्या आरोपांचा आणि त्यांच्या भाषण शैलीचा समाचार घेतला. राज यांचे थेट नाव घेणार्‍या मुख्यमंत्र्यांनी आपल्या अन्य विरोधकांची नावे उघडपणे घेणे टाळत राज आणि विरोधक असे म्हणत विरोधकांवर टीका केली. मागील काही दिवसांपासून राज ठाकरे मराठीचा मुद्दा पुढे करत आहेत. मराठीप्रेम व्यक्त करतानाच ते सेना-भाजप युती आणि कॉंग्रेस-राष्ट्रवादी आघाडीच्या नेत्यांना मराठी माणसाची गळचेपी केली म्हणून धारेवर धरत आहेत. राज्यातील अनेक प्रस्थापित बड्या नेत्यांवर टीका करताना आरोपांची राळ उठवत आहेत. या पार्श्र्वभूमीवर राज यांच्या वक्त्यव्याबाबत मुख्यमंत्र्यांची प्रतिक्रिया जाणून घेण्यासाठी प्रश्न विचारताच मुख्यमंत्र्यांनी राज ठाकरे आणि सगळ्या विरोधकांना पावसाळी बेडूक म्हणत त्यांना फार किंमत देत नसल्याचेच संकेत दिले.