मनपा प्रभाग क्र. २५ ब मधील शिवसेनेच्या प्रबळ उमेदवाराने मनसेनेच्या एका उमेदवाराविरुध्द घेतलेली हरकत व प्रभाग २८ अ मधील मनसेनेच्या उमेदवाराने रा.कॉं. उमेदवाराविरुध्द घेतलेली हरकत निवडणूक निर्णय अधिकार्‍यांनी फेटाळल्याने या उमेदवारांनी मुंबई उच्च न्यायालयात धाव घेतली आहे. प्रभाग २५ ब मधील मनसेनेच्या उमेदवाराने वारसाने आलेल्या मालमत्तेची घरपट्टी व पाणीपट्टी भरलेली नसल्याबाबतची हरकत शिवसेनेने घेतली होती. मात्र मनपाने मनसेना उमेदवाराला ना हरकत दाखला दिल्याने ही हरकत निवडणूक निर्णय अधिकार्‍यांनी फेटाळली होती. या निर्णयाविरुध्द शिवसेना उमेदवाराने उच्च न्यायालयात धाव घेतली असून यावर उद्या (दि.६) रोजी कामकाज होण्याची शक्यता आहे. प्रभाग २८ अ मधील राष्ट्रवादी कॉंग्रेसच्या उमेदवाराच्या अपत्यांवरून मनसेना उमेदवाराने हरकत घेतली होती. ती फेटाळण्यात आली. या निर्णयाविरुध्द उच्च न्यायालयात अपील दाखल करणार असल्याचे मनसेना पदाधिकारी ऍड. अभिजित बगदे यांनी सांगितले.