- केडगावला पाणीपुरवठा करणारी जलवाहिनी कायनेटिक चौकात वाहनाची धडक बसल्याने फुटली. त्यामुळे या भागात आज दिवसभर पाणी सोडण्यात आले नाही. येथील रेल्वे उड्डाणपुलावर कठड्याच्या कडेने जाणारी जलवाहिनी उघड्यावर आहे. या जलवाहिनीला रविारी रात्री 11 च्या सुमारास कंटेनरची जोराची धडक बसली. त्यामुळे जलवाहिनीला पुलावरच गळती लागली. दरम्यान जलवाहिनी फुटल्याची माहिती मिळाल्यानंतर खडबडून जाग आलेल्या पाणीपुरवठा विभागातील कर्मचार्‍यांनी या भागाकडे जाणारे पाणी बंद केले. जलवाहिनी फुटल्यामुळे पाणी वाया गेले. जलवाहिनीमध्येच फुटल्यामुळे केडगाव येथील जलकुंभापर्यंत पाणी पोहोचू शकले नाही. यामुळे आज सकाळी केडगावातील लोंढे मळ्यात पाणी आले नाही. पाणीपुरवठा विभागाचे कनिष्ठ अभियंता निंबाळकर यांच्या मार्गदर्शनाखाली जलवाहीनी दुरुस्तीचे काम दिवसभर हाती घेण्यात आले होते. दुपारी जलवाहीनी दुरुस्त करण्यात त्यांना यश आले. या ठिकाणी दुरुस्ती झाल्यानंतर कोठला चौक आणि स्टेट बँक चौकातील गळतीही थांबविण्यासाठी जलवाहिनीची दुरुस्ती करण्यात आली. सायंकाळी उशिराने केडगाव येथील जलकुंभात पाणी सोडण्यात आले. उद्या सकाळी केडगाव परिसरात पाणी येईल, असे सांगण्यात आले.