महापालिका निवडणुकीसाठी राष्ट्रवादी कॉंग्रेस पक्षाने दोन टप्प्यात ५५ उमेदवार जाहीर केल्यानंतर वादात अडकलेल्या ५ जागांवरील उमेदवारांच्या नावावर आज (दि.४) एकमत होऊन ही नावे पक्षाकडून जाहीर करण्यात आली. त्यांना पक्षाकडून एबी फॉर्म देण्यात आले. यामुळे आता महापालिका निवडणुकीच्या रिंगणात एकूण ६० उमेदवार झाले आहेत. महापालिका निवडणुकीसाठी राष्ट्रवादी कॉंग्रेसने प्रथम ५० उमेदवारांची यादी जाहीर केली होती. त्यानंतर दुसर्‍या टप्प्यात पाच उमेदवारांची घोषणा झाली होती. तरीही चार जांगावर उमेदवारांची निश्‍चिती वादात अडकली होती. अखेर त्यावर उमेदवारी माघारीच्या दिवशी निर्णय झाला. त्यानंतर राकॉं शहराध्यक्ष गजानन शेलार यांनी शिल्लक राहिलेल्या उमेदवारांची नावे जाहीर केली. यात प्रभाग क्र.२९ अ मधून विनायक (नैय्या) खैरे व ब गटात रंजना ज्ञानेश्‍वर पवार, प्रभाग क्र. २१ ब मधून विक्रांत प्रकाश मते, प्रभाग क्र. ५४ अ मधून गजानन दामोदर शेलार यांना उमेदवारी देण्यात आली आहे. प्रभाग क्र. ११ अ मधून कॉंग्रेसने सरिता सोनवणे यांना उमेदवारी जाहीर केली होती. मात्र त्यांनी उमेदवारी अर्जच भरला नाही. त्यामुळे या प्रभागातील दुसरीही जागा आपोआप राष्ट्रवादी कॉंग्रेसच्या वाट्याला आली. त्यामुळे राकॉंने ही जागा पक्षाचे पहिले नगरसेवक सुरेश खेताडे यांची पत्नी इंदुबाई सुरेश खेताडे यांना दिली. आघाडीतील फॉम्युला कॉंग्रेस ६४ व राकॉ ५८ असा ठरला होता, असे असले तरी दोन ठिकाणी कॉग्रेस व राकॉ यांच्यात लढत होणार असल्याने राकॉंच्या पदरी ६० जागा झाल्या आहेत.