- महापालिकेने थकबाकीदारांच्या विरोधात वसुलीची मोहीम उघडली असून दिलेले धनादेश न वटल्याने 17 लाख 39 हजारांच्या वसुलीसाठी येथील अशोका हॉटेल आज पुन्हा सील केले. उपायु्नत डॉ. पंकज जावळे यांच्या नेतृत्वाखाली पथकाने ही कारवाई केली. महापालिकेची पाणीपट्टी, घरपट्टी आणि संकलित करापोटी 125 कोटी रुपये थकले आहेत. या पार्श्वभूमीवर कर वसुलीची मोहीम पुन्हा गतिमान करण्यात आली आहे. यापूर्वीही अशीच मोहीम राबविण्यात आली होती. त्यावेळी झेंडीगेट प्रभागातील अशोका हॉटेल मालकास 22 लाख 48 हजार रुपयांच्या थकबाकीसाठी जप्तीची नोटीस बजावण्यात आली होती, मात्र नोटिसा बजावून थकबाकी न भरल्याने जावळे यांनी पोलिस संरक्षणात जप्तीची कारवाई केली होती. कारवाईनंतर हॉटेल मालकाने 5 लाख रुपयांचा धनादेश दिला. परंतु, त्या खात्यावर रक्कम जमा नसल्याने धनादेश वटलाच गेला नाही. महापालिकेने धनादेश दोनदा बँकेकडे पाठवूनही प्रतिसाद मिळाला नाही. हॉटेल चालकास या विषयी वारंवार बजावूनही त्याने दखल घेतली नाही. त्यामुळे आज पुन्हा उर्वरित 17 लाख 39 हजार रुपयांच्या थकबाकीसाठी जावळे यांच्या नेतृत्वाखालील पथकाने हॉटेल सील केले. हॉटेल मालकाने कारवाईस भाग पाडल्याने 15 हजार रुपयांचा दंड त्यास करण्यात आला आहे. पूर्वी जप्तीची कारवाई केल्यानंतर हॉटेल चालकाचा धनादेश वटला नाही. म्हणून महापालिकेच्यावतीने त्यास अनेकवेळा समज दिली होती. मात्र त्याची दखल घेतली जात नसल्याने अखेर ही कारवाई करण्यात आली. विशेष वसुली पथकाचे झेंडीगेट प्रभागाचे नियंत्रक नगर रचनाकार संतोष धोंगडे यांच्या मार्गदर्शनाखाली के. सी.वर्मा, नागनाथ पवळे, प्रभाग अधिकारी यांनी ही कारवाई केली. या कारवाईमुळे शहरात खळबळ उडाली आहे.