विलासराव देशमुख शिक्षण प्रसारक व बहुउद्देशीय संस्थेद्वारा संचालित राजीव गांधी मिलिटरी स्कूलच्यावतीने देण्यात येणार्‍या राज्यस्तरीय सावित्री पुरस्कार जिल्हा परिषदेच्या अध्यक्षा शालिनीताई विखे यांना केंद्रीय अवजड उद्योगमंत्री विलासराव देशमुख यांच्या हस्ते सोमवारी बुलढाणा येथे झालेल्या कार्यक्रमात प्रदान करण्यात आला. राजीव गांधी सैनिक शाळेच्या प्रांगणात झालेल्या कार्यक्रमात साडीचोळी, 11 हजार रुपये रोख आणि स्मृतिचिन्ह देऊन अध्यक्षा विखे यांना हा पुरस्कार प्रदान करण्यात आला. अहमदनगर जिल्हा परिषद देशात दुसर्‍या क्रमांकावर नेऊन जिल्ह्यातील महिला बचत गटाच्या चळवळीतील प्रमुख योगदान असल्याने अध्यक्षा विखे यांना हा पुरस्कार देण्यात आला. यावेळी नवाकाळच्या संपादिका जयश्री खाडिलकर-पांडे, आमदार प्रणिता शिंदे, माहिती व जनसंपर्क संचालक श्रध्दा बेलसरे-खारकर, डॉ. जया द्वादशीवार, प्रा.निशा शेंडे-पावडे आदींना हा पुरस्कार देण्यात आला. कार्यक्रमाच्या अध्यक्षस्थानी ज्येष्ठ पत्रकार तथा राज्य अधिस्वीकृती समितीचे अध्यक्ष प्रफुल्ल मारपकवार होते. आमदार दिलीपकुमार सानंदा, विजयराज शिंदे, राहुल बोंद्रे, डॉ.राजेंद्र गोडे आदी उपस्थित होते.