जळगाव –
अष्टभुजानगरातील अष्टभुजा गेटजवळील परिसरामधील एका बांधकाम व्यावसायिकाने त्यांच्या बांधकामाच्या ठिकाणी गळफास घेवून आत्महत्या केल्याची घटना मंगळवारी दुपारी 12.30 वाजेच्या सुमारास उघडकीस आली. याबाबत तालुका पोलीस ठाण्यात अकस्मात मृत्यूची नोंद झाली आहे.
अनिल जगन्नाथ सूर्यवंशी (वय-55, अष्टभुजानगर, पिंप्राळ, मूळ रा. वढोदा, ता.चोपडा) हे सुमारे 22 वर्षांपासून जळगावात कुटुंबासह राहतात. ते बांधकाम व्यावसायिक असून अनेक ठिकाणी त्यांचे बांधकाम सुरू आहेत. त्यापैकी तालुका पोलीस ठाण्याच्या समोर खोटेनगरातील सृष्टी कंन्स्ट्रक्शन च्या इमारतीचे बांधकाम सुरू आहे.
ते मंगळवारी सकाळी 8 वाजता कामावर गेले. त्यांनी दुपारी 12 ते 1 वाजेच्या दरम्यान इमारतीच्या तळमजल्यावरील गाळ्यात दोरीने गळफास घेवून आत्महत्या केली. ही घटना त्याच परिरात राहत असलेल्या एका मुलीच्या लक्षात आली.
तिने परिसरातील नागरिकांना सांगितले असता घटनास्थळी मोठी गर्दी उसळली. जिल्हा रुग्णालयातील नातेवाईकांचा आक्रोश अंगावर शहारे आणणारा होता.
सधन कुटुंब, प्रसिद्ध व्यावसायिक म्हणून ओळख
मृत अनिल सूर्यवंशी यांच्या पश्चात पत्नी वैशाली, मुलगा डॉ. कृणाल सुर्यवंशी आणि मुलगी कृतिका असा परिवार आहे. त्यांचे जुळे बंधू सुनील सूर्यवंशी जिल्हा बँकेच्या शाखेत कार्यरत आहेत. याबाबत तालुका पोलीस ठाण्यात अकस्मात मृत्यूची नोंद झाली आहे. दरम्यान, अनिल सूर्यवंशी हे शहरातील प्रसिद्ध व्यावसायिक व अत्यंत सधन कुटुंबातील होते. त्यामुळे त्यांच्या आर्थिक व्यवहारांच्या गुंत्याची शक्यता कमी आहे. त्यामुळे त्यांनी आत्महत्या का केली? असा प्रश्न उपस्थित होते आहे. त्यांच्यावर मूळ गावी वडोदा येथे शोकाकूल वातावरणात अंत्यसंस्कार करण्यात आले.
मोबाइलवर संपर्क नाही
बांधकाम व्यावसायिक अनिल सूर्यवंशी यांचा मुलगा डॉ.कुणाल सूर्यवंशी हे शासकीय वैद्यकीय महाविद्यालय व रुग्णालयात वैद्यकीय अधिकारी आहेत. ते जेवणासाठी घरी आले असता, त्यांचे वडील मोबाइल रिसीव्ह करीत नाहीत, असे आईने डॉक्टर मुलाला सांगितले. त्यामुळे डॉक्टर पूत्र खाटेनगरातील साइडवर पोहचले आणि तेथील गर्दी बघून ते गोंधळले. घटनास्थळी आल्यानंतर त्यांना चक्क वडिलांनी गळफास घेतल्याचे दिसले. याच वेळी त्यांनी आक्रोश केला. बांधकाम व्यावसायीकाने केलेल्या आत्महत्येची घटना शाहरात समजताच मोठ्या प्रमाणात बांधकाम व्यावसायीकांनी जिल्हा रूग्णालयात गर्दी केली होती. यावेळी एकच हळहळ व्यक्त होत होती.
नातेवाईकांचा आक्रोश
यासंदर्भात कळताच तालुका पोलिसांनी घटनास्थळी धाव घेतली. पोलिसांनी मृतदेहाचा पंचनामा केला. जिल्हा वैद्यकीय महाविद्यालयात मृतदेह आणण्यात आला. या वेळी जिल्हा रुग्णालयात कुटुंबीय, नातेवाईक आणि मित्र परिवाराची मोठी गर्दी उसळली होती. कुटुंबियांंसह नातेवाईकांनी आक्रोश केला. दरम्यान, गळफासाने मृत्यू झालेला आहे, असा शवविच्छेदनानंतर प्राथमिक अहवाल देण्यात आला, असे वैद्यकीय अधिकारी डॉ.दीपक पाटील यांनी सांगितले. दरम्यान प्रातमिक शवविच्छेदन अहवालात मयत अनिल सुर्यवंशी यांचा मृत्यू गळफास घेतल्याने झाल्याचे नमुद करण्यात आले आहे. दरम्यान गळफास का घेतली हे मात्र स्पष्ट झालेे नाही.
