गुजरात-हिमाचल निवडणुकांनंतर केद्रात पुन्हा खांदेपालट?

0
नवी दिल्ली |  वृत्तसंस्था :  संपूर्ण देशाचे लक्ष लागून राहिलेल्या गुजरात आणि हिमाचल प्रदेश विधानसभा निवडणुका झाल्यानंतर केंद्रीय मंत्रिमंडळात पुन्हा एकदा फेरबदल होण्याची शक्यता सूत्रांनी व्यक्त केली आहे. यात जेडीयूव्यतिरिक्त मित्रपक्षांच्या नेत्यांना संधी मिळण्याची मोठी शक्यता आहे.

विद्यमान मंत्र्याच्या खात्यांमध्येही जुजबी बदल होण्याची शक्यताही व्यक्त करण्यात येत आहे. सूत्रांनी दिलेल्या माहितीनुसार, अर्थसंकल्पीय अधिवेशनापूर्वी होणारा हा संभाव्य फेरबदल मोदी सरकारच्या या कार्यकाळातील शेवटचा फेरबदल असणार आहे आणि याच टीमसह मोदी सरकार २०१९ च्या निवडणुकांना सामोरे जाईल.

मागील मंत्रिमंडळाच्या फेरबदलात जेडीयू, शिवसेना आणि टीडीपीसारख्या मित्रपक्षांना संधी मिळाली नव्हती. एआयडीएमकेदेखील एनडीएत सहभागी होऊन सरकारमध्ये येऊ शकतो, अशी चर्चाही ऐकायला मिळत होती. तामिळनाडूतील हा पक्ष एनडीएचा औपचारिक भाग बनला तर या पक्षाला मोदी सरकारमध्ये स्थान मिळू शकते.

पंतप्रधानांनी बोलावली मंत्र्यांची बैठक

दरम्यान, पंतप्रधान नरेंद्र मोदी यांनी नव्या वर्षाचा संकल्प करण्यासाठी आपल्या सर्व मंत्र्यांची बैठक बोलावली आहे. या बैठकीत पंतप्रधान मोदी आपल्या मंत्र्यांना कठीण होमवर्क देणार आहेत. त्यानंतर सर्वच मंत्र्यांना पंतप्रधान मोदी यांच्या कल्पनांची अंमलबजावणी करावी लागणार आहे. १० नोव्हेंबरला ही बैठक पार पडणार आहे. या बैठकीत हिवाळी अधिवेशनाची तयारीही केली जाणार आहे.

याबरोबरच, ८ नोव्हेंबरला नोटबंदीच्या निर्णयाला १ वर्ष पूर्ण होत आहे. या निर्णयाचा आढावाही या बैठकीत घेतला जाणार आहे.

आता केवळ कृती

सरकारच्या उर्वरित कार्यकालात केवळ कृती होईल आणि यापुढे कुणीही कामे टाळू शकत नाही असे पंतप्रधान मोदी यांनी सर्व मंत्र्यांना स्पष्ट केले आहे. या बैठकीत मोदी आपल्या मंत्र्यांच्या कामांची तपासणीही करणार आहेत. याच बैठकीत हिवाळी अधिवेशनाची रणनीतीही तयार केली जाणार आहे.

शिवाय या अधिवेशनात महत्त्वाकांक्षी ओबीसी विधेयक मंजूर करण्याचा प्रयत्नही केला जाणार आहे. संसदेचे हिवाळी अधिवेशन नोव्हेंबर महिन्याच्या दुसर्‍या आठवड्यात सुरू होण्याची शक्यता आहे.

LEAVE A REPLY

*