पीक विम्याची भरपाई लवकर मिळावी : खा. रक्षा खडसे

0
नवी दिल्ली, |  प्रतिनिधी :  प्रधानमंत्री पीक विमा योजनेची मुदत एका महिन्याने वाढवण्यात यावी व नुकसान झालेल्या शेतकर्‍यांना पीक विम्याची भरपाई त्वरित मिळावी, अशी मागणी खा. रक्षा खडसे यांनी लोकसभेत केली.

प्रधानमंत्री पीक विमा योजनेत खरीप २०१६ पासून अत्यंत कमी प्रीमियम भरून पीक विमा योजनेचा फायदा घेता येणार होता. शेतकर्‍यांनादेखील प्रधानमंत्री पीक विमा योजना फायद्याची वाटल्यामुळे पीक विमा योजने अंतर्गत सिंचन क्षेत्र वाढले आणि या योजनेत सहभागी होणार्‍या शेतकर्‍यांची संख्या वाढली.

बर्‍याच राज्यांनी या योजनेत कमी स्वारस्य दाखवले व त्यांच्या बेजबाबदार धोरणामुळे खरीप २०१६ मध्ये झालेल्या पीक नुकसानीची भरपाई शेतकर्‍यांना खूप उशिराने किंवा कमी प्रमाणात मिळाली, पिकाच्या नुकसानीची सुचना कंपनीला लवकरात लवकर कळवणे व विमा कंपनीद्वारे नुकसान झालेल्या पिकाची नुकसान भरपाई त्वरित मिळवून देणे या कामांमध्ये दिरंगाई झाल्यामुळे प्रधानमंत्री पीक विमा योजना चांगली असूनही त्याचा लाभ अनेक शेतकर्‍यांना झाला नाही.

राज्य सरकारने पीक विमा योजनेत येणार्‍या सर्व समस्या दूर कराव्या, जेणेकरून येणार्‍या खरीप हंगाम २०१७ मध्ये शेतकर्‍यांचा पीक विमा योजनेत सहभागी वाढेल व त्यांचे नुकसान झाल्यास त्यांना नुकसान भरपाई लवकरात लवकर मिळेल अशा सुचना केंद्र सरकारने राज्य सरकारला द्याव्यात.

प्रधानमंत्री पीक विमा योजनेच प्रीमियम भरण्याची शेवटची तारिख जी ३१ जुलै २०१७ आहे, तिचा अवधी आणखी १ महिन्याने वाढवण्यात यावा आणि पुढील वर्षी या तारखेचे नियोजन अशा प्रकारे करावे जेनेकरून जास्तीत जास्त शेतकरी निर्धारीत तारखेच्या आत प्रीमियम भरू शकतील व नुकसान झाल्यास पीक विम्याची भरपाई त्यांना त्वरित मिळेल, अशी व्यवस्था करावी, अशी मागणी लोकसभेत खा. रक्षा खडसे यांनी केली.

LEAVE A REPLY

*