जीएसटीविषयी ५५ टक्के लोक अनभिज्ञ : ‘वे टू ऑनलाईन’च्या सर्वेक्षणातील निष्कर्ष

0

मुंबई |  वृत्तसंस्था :  नव्याने लागू झालेल्या जीएसटीबद्दल सर्वसामान्यांना किती माहिती आहे, याचा अंदाज घेण्यासाठी ‘वे टू ऑनलाईन’तर्फे नुकतेच सर्वेक्षण करण्यात आले. यातून जीएसटीबाबत जनतेला कितपत माहिती आहे याचा अंदाज घेताना काही धक्कादायक बाबी पुढे आल्या आहेत.

सर्वंकष पाहणीमध्ये असे दिसून आले की, देशातील निम्म्याहून कमी म्हणजे केवळ ४५ टक्के जनतेला जीएसटी या नवीन कररचनेबद्दल माहिती आहे. उर्वरित ५५ टक्के जनतेला जीएसटी म्हणजे काय, हेही माहीत नाही.

तेलंगणा आणि आंध्रप्रदेश ही तेलुगू भाषक राज्ये जीएसटीबद्दल तुलनेने जागरूक आहेत. या राज्यांतील ६४ टक्के जनतेला जीएसटीबद्दल माहिती आहे. अर्थात ही आकडेवारी चांगली वाटत असली, तरी यातील ५८ टक्के जनतेने जीएसटी ही कररचना फारशी चांगली नाही, असे मत व्यक्त केले आहे.

एकीकडे तेलंगणा आणि आंध्र प्रदेश या तेलुगू भाषक राज्यांमध्ये जीएसटीबद्दल सर्वाधिक जागरूकता आहे, तर दुसरीकडे या राज्यांच्या जवळच्या तमिळनाडूत जीएसटीबद्दल अजिबातच काही माहिती नाही. तमिळनाडूतील ७६ टक्के लोकांना जीएसटीबद्दल काहीही माहिती नाही.

जीएसटी ही कररचना महाराष्ट्रातील ४३ टक्के जनतेच्या पसंतीस उतरली असून पश्‍चिम बंगालमधील ३२ टक्के, गुजरातमधील ३९ टक्के, केरळातील ३६ टक्के, कर्नाटकातील ४१ टक्के आणि इतर हिंदी भाषिक राज्यांतील ४३ टक्के जनतेने ही कररचना उपयुक्त असल्याचे मान्य केले आहे.

महाराष्ट्राची आघाडी

‘वे टू ऑनलाईन’ या ऍपने २६ जून ते ३० जून या काळात देशभरातील तीन लाख ६० हजार लोकांशी बोलून एक पाहणी केली. देशातील लोकांना जीएसटी आणि त्याच्या परिणामांबद्दल किती माहिती आहे याचा अभ्यास या पाहणीत करण्यात आला.

यात महाराष्ट्रातील ६३ टक्के जनतेला जीएसटीविषयक माहिती असून पश्‍चिम बंगालमध्ये हे प्रमाण ६२ टक्के, गुजरातमध्ये ५१ टक्के, केरळमध्ये ५९ टक्के, कर्नाटकमध्ये ५७ टक्के तर हिंदी भाषिक राज्यांत ५२ टक्के इतके आहे.

LEAVE A REPLY

*