सहा हजार श्रीसदस्यांच्या हस्ते होणार वृक्षारोपण

0
जळगाव । प्रतिनिधी-राज्य शासनामार्फत येत्या 1 ते 7 जुलै 2017 दरम्यान राज्यात 4 कोटी वृक्षलागवडीचा कार्यक्रम शासनाने हाती घेतला आहे.
या वृक्ष लागवड मोहीमेत मागील वर्षाप्रमाणे यंदाही रेवदंडा येथील डॉ.नानासाहेब धर्माधिकारी प्रतिष्ठानचे सहकार्य शासनाला लाभणार असून जळगाव जिल्ह्यात दि.4 जुलै रोजी विविध ठिकाणच्या वनक्षेत्रात पद्मश्री आप्पासाहेब धर्माधिकारी व सचिनदादा धर्माधिकारी यांच्या मार्गदर्शनाखाली हजारो श्रीसदस्यांच्या हस्ते वृक्ष लागवड करण्यात येणार आहे.
महाराष्ट्र राज्याचे वनमंत्री सुधीर मुनगंटीवार यांनी मागीलवर्षी राज्य शासनाच्या दोन कोटी वृक्ष लागवड
मोहीमेत डॉ.नानासाहेब धर्माधिकारी प्रतिष्ठानचे सहकार्य शासनाला मिळावे यासाठी त्यांनी पद्मश्री डॉ.आप्पासाहेब धर्माधिकारी यांची भेट घेवून वृक्षलावगडीसाठी सहकार्य मिळावे अशी विनंती केली होती.

या विनंतीस मान देत मागील वर्षी झालेल्या दोन कोटी वृक्ष लागवड मोहीमेस डॉ.नानासाहेब धर्माधिकारी प्रतिष्ठानचे मोलाचे योगदान शासनाला लाभले होते.

या मोहीमेत श्री सदस्यांचे स्वयंस्फुर्तीने लाभलेले योगदान बघता शासनाने यावर्षी सुध्दा चार कोटी वृक्ष लागवड मोहीमेत डॉ.नानासाहेब धर्माधिकारी प्रतिष्ठानचे सहकार्य मिळावे यासाठी वनंमंत्री श्री.मुनगंटीवार यांनी प्रतिष्ठानला विनंती केली आहे.

या अनुषंगाने यावर्षी सुध्दा दि.4 जुलै रोजी सुमारे सहा हजार श्रीसदस्यांच्या हस्ते जिल्ह्यातील विविध ठिकाणच्या वनक्षेत्रात एकाच दिवशी वृक्ष लागवड केली जाणार आहे.

या मोहीमेस सकाळी 7 वाजता सुरूवात होणार असून जिल्ह्यातील श्री सदस्य स्वयंस्फुर्तीने वृक्षलागवडीसाठी आवश्यक ती साधने स्वत: हातात घेवून शासनाची कोणतीही मदत न घेता आपले कर्तव्य पार पाडणार आहेत.

राज्याचे स्वच्छतादूत पद्मश्री डॉ.अप्पासाहेब धर्माधिकारी यांच्या नेतृत्वाखाली व सचिनदादा धर्माधिकारी यांच्या मार्गदर्शनाखाली जिल्ह्यातच नव्हे तर संपूर्ण राज्यात राबविल्या जात असलेल्या शासनाच्या चार कोटी वृक्ष लागवड मोहीमेत प्रतिष्ठानचे सर्वचठिकाणी वृक्ष लागवडीसाठी सहकार्य लाभणार आहे.

 

LEAVE A REPLY

*