तारण सुरक्षित राहण्यासाठी बँकेचा प्रतिकात्मक ताबा – जैन

जळगाव |  प्रतिनिधी : कर्जापोटी मालमत्ता स्वरूपात असलेले तारण सुरक्षित राहण्यासाठीच बँकेने केवळ प्रतिकात्मक ताबा घेऊन कायदेशीर प्रक्रियेची अंमलबजावणी केली असल्याची माहिती राष्ट्रवादीचे माजी खा. ईश्‍वरलाल जैन यांनी आज ‘दै. देशदूत’शी बोलतांना दिली.

थकीत ३६४ कोटीच्या कर्जापोटी स्टेट बँकेने ‘राष्ट्रवादीचे माजी खा. ईश्‍वरलाल जैन यांच्या मालमत्तांवर प्रतिकात्मक टाच’ या मथळ्याखाली आज ‘दै. देशदूत’ने प्रथम पानावर वृत्त प्रकाशित केले.

या वृत्तामुळे व्यापारी वर्गासह जिल्ह्यात मोठी खळबळ उडाली होती.

दरम्यान यासंदर्भात माजी खा. ईश्‍वरलाल जैन यांची भूमिका जाणून घेतली असता त्यांनी सांगितले की, माझे ६६३ कोटी रूपये त्यांच्याकडे घेणे आहे. याबाबत औरंगाबाद खंडपीठासह डीआरटी न्यायालयातही प्रकरण न्यायप्रविष्ट आहे.

माझ्या मालमत्तांसंदर्भात मी स्वत: माझा माणूस पाठवून बँकेच्या अधिकार्‍यांना माहीती दिली आहे. ही मालमत्ता कुणी विकत घेऊ नये आणि तारण सुरक्षित रहावे यासाठीच बँकेने कायदेशीर प्रक्रिया राबवुन केवळ प्रतिकात्मक ताबा घेतला असल्याचे माजी खा. जैन यांनी सांगितले.

मी घेतलेल्या कर्जासाठी तारण म्हणून जी मालमत्ता दिली आहे त्यासंबंधीची संपुर्ण माहीती बँकेला यापुर्वीच दिली आहे. त्यामुळे प्रतिकात्मक ताबा घेणे ही केवळ कायदेशीर प्रक्रिया असल्याचे श्री. जैन यांनी ‘दै. देशदूत’शी बोलतांना सांगितले.

LEAVE A REPLY

*