धरणगावला भर दिवसा कुर्‍हाडीचा धाक दाखवून लाखोंची लुट

0
धरणगाव, |  प्रतिनिधी  : येथील चिंतामणी मोरया नगरात सोमवारी दुपारी दिवसाढवळ्या पडलेल्या दरोड्यामुळे शहरात दहशत पसरली आहे. चोरट्यांंनी घरात पुरुष कोणीच नाही, ङ्गक्त महिला असल्याचे हेरुन त्यांना कुर्‍हाडीच्या धाक दाखवत धमकावून साडेचार लाखांचा ऐवज हिसकावून नेला.

ही घटना घडत असतांना गल्लीत किंवा परिसरात कुणालाच सुगावा लागला नाही किंवा संशयही आला नाही याबद्दल चर्चा सुरु असली तरी जीवाच्या भितीने घरातील महिला ओरडू शकल्या नाहीत किंवा चोरट्यांचा प्रतिकार करु शकल्या नाहीत.

दोन चोरटे

मोटारसायकलवरुन आलेले दोन चोरटे धरणगावातील चिंतामणी मोरया नगरातील रहिवाशी पुष्पक ओंकार नारखेडे यांचा प्रशस्त बंगल्यात आले. दुपारी चोरी झाली तेव्हा घरात एकही पुरुष नव्हता त्यामुळे या घरातील पुरुषांच्या हालचालींची माहिती घेवून चोरट्यांनी त्यांच्यावर पाळत ठेवली असावी.

दुपारची नेमकी पुरुष मंडळी घरात नसल्याची वेळ साधून त्यांनी हा डाव साधला त्यामुळे दरोडेखोर परिसरातीलच किंवा या शहराची माहिती असलेले असावेत, असा पोलिसांचा अंदाज आहे. मोटारसायकलवरुन आलेल्या या दोन चोरट्यांनी रुमालाने त्यांचे चेहरे पूर्ण झाकलेले होते.

त्यांच्याजवळ ङ्गक्त कुर्हाडी होत्या अन्य शस्त्रे नव्हती. घरात प्रवेश करताच त्यांनी घरातील दोन महिलांना जीवे मारण्याची धमकी दिली आणि महिलांशिवाय तिसरी व्यक्ती घरात नसल्याचा अंदाज घेतला.

धमकावल्यावर या महिला प्रतिकार करु शकत नसल्याचे लक्षात आल्यावर त्यांनी महिलांना जो असेल तो ऐवज आणून द्या असा दम भरला. त्यामुळे कपाट किंवा अन्यत्र कुठेही चोरट्यांच्या बोटाचे ठसे सहज मिळविणे पोलिसांना शक्य नव्हते. पोलीस निरिक्षक वाघमारे यांनी पथकासह घर व परिसराची पाहणी केली.

२२ तोळे सोने व एक लाख ८५ हजार रुपये रोख दरोडेखोरांनी हिसकावून नेेल्याचे सांगण्यात येत होते. सुनंदा पुष्पक नारखेडे यांच्या ङ्गिर्यादीवरुन सायंकाळी धरणगाव पोलीस ठाण्यात चोरट्यांविरुद्ध गुन्हा नोंदविण्यात आला.

या चोरीच्या घटनेने शहरात खळबळ उडाली असून तपासासाठी धागेदोरे मिळविणे हे पोलिसांपुढचे खरे आव्हान आहे. पोलिस खात्यातील वरीष्ठ अधिका-यांनी उशिरापर्यत घटनास्थळी भेट दिली.

ना.पाटलांच्या सत्काराची गर्दी

ही घटना घडली त्या आगोदर काही मिनिटांपूर्वी घटनास्थळापासून काही अंतरावर ना. गुलाबराव पाटील यांनी विकास कामांचे उद्घाटन केले. त्यांच्या वाढदिवसानिमित्त गावात मोठी गर्दी होती.

पोलिसांची गस्त होती. तरी चोरट्यांंनी हे दु:साहस केले. यावरुन त्यांना गावातील गोंधळाची व परीसरातील एकांताची कल्पना असावी. अशी चर्चा नागरीकात होती.

पैसे द्यायला आलोत

बंगल्यावर पोहचलेल्या व्यक्तीने बेलवाजवून आम्ही साहेबांचे पैसे द्यायला आलो आहोत, असा बनाव करुन दार उघडायला लावले. आतून दार उघडल्यावर घरात घूसून त्यांनी चाकू लावला व कुर्‍हाडीचा धाक दाखवत दार बंद करून घेतले.

अशी चर्चा परीसरात ऐकू आली. यावरुन कॉलनी परीसरात राहणार्‍या एकट्या दुकट्या महिलेने पूर्ण ओळख पटल्याशिवाय दार उघडू नये अशी चेतावनी जेष्ठ नागरीक देत होते.

 

LEAVE A REPLY

*