धुळ्यात संवेदनशील भागात सीसीटीव्ही कॅमेरे !

0
धुळे । दि.24 । प्रतिनिधी-गणेशोत्सवासाठी महापालिकेतर्फे उपाययोजना हाती घेण्यात आली आल्या असून शहरातील संवेदनशील भागात सीसीटीव्ही कॅमेरे बसविण्याचा निर्णयही महापालिका प्रशासनाने घेतला आहे. अशी माहिती महापौर सौ. कल्पना महाले यांनी दिली आहे.
गणेशोत्सव काळात करण्यात येणार्‍या उपाययोजनांवर चर्चा करण्यासाठी आज महापौर महाले यांच्या अध्यक्षतेखाली बैठक घेण्यात आली. यावेळी आयुक्त सुधाकर देशमुख हेही उपस्थित होते.

शहरातील मुख्य प्रमुख मार्ग व मिरवणूक मार्गांवर मोठ मोठे खड्डे पडले आहेत. सदर खड्डे त्वरीत बुजवावेत व शहरातील निम्मे भागातील पथदिवे बंद आहेत. त्यांची त्वरीत दुरुस्ती करण्यात यावी. अशी सूचना यावेळी महापौरांनी दिली.

गणपतीचे विसर्जन पांझरा नदीत केले जाते त्यामुळे नदी पात्रातील स्वच्छता त्वरीत करण्यात यावी. तसेच हत्तीडोह व नदीकिनारी प्रकाशझोताची व्यवस्था करण्याबाबतही निर्देश महापौरांनी दिले.

गणपती विसर्जनाच्या दिवशी निर्माल्य व मूर्ती संकलनाची व्यवस्था महापालिकेतर्फे करण्यात येणार आहे. त्यासाठी वाहनांची व्यवस्था व कर्मचार्‍यांची नियुक्ती करण्यात येणार आहे. मिरवणूक काळात मोकाट जनावरांचा त्रास होवू नये म्हणून कर्मचार्‍यांचे पथक नियुक्त करण्यात येणार आहे.

तसेच मिरवणूक मार्गावर अतिक्रमणे झाल्यामुळे मिरवणूकीत अडथळा येण्याची शक्यता आहे. त्यामुळे मुख्य रस्त्यावरील अतिक्रमणे त्वरीत काढण्यात यावीत.

तसेच मिरवणूक मार्गावर अग्निशमन दलाचे पथक व वैद्यकीय व्यवस्था करावी अशीही सूचना या बैठकीत देण्यात आली.

गणेशोत्सवा संदर्भात परवानगी देतांना सुटसुटीतपणा ठेवून तात्काळ परवानगी द्यावी. तसेच संवेदनशील ठिकाणी सीसीटीव्ही कॅमेरे बसविण्याबाबतही सूचना महापौरांनी केल्या आहेत.

प्रमुख मार्ग व कचरा कुंड्यांची दैनंदिन स्वच्छता दिवसातून दोन वेळा करण्याच्या सूचनाही यावेळी देण्यात आल्या.
बैठकीला उपायुक्त जाधव, नगरसेवक चंद्रकांत सोनार, संदीप महाले, सुनिल महाले, अभियंता कैलास शिंदे, आरोग्य अधिकारी डॉ. महेश मोरे, सहाय्यक आरोग्य अधिकारी रत्नाकर माळी, कनिष्ठ अभियंता एन.के.बागूल, अग्निशमन अधिकारी श्री. ढाके, कनिष्ठ अभियंता प्रकाश सोनवणे, प्रभारी नगरसचिव मनोज वाघ आदी उपस्थित होते.

 

 

LEAVE A REPLY

*