‘बेलगंगा’ अंबाजी ट्रेडिंगकडे !

0
जळगाव । दि.11 । प्रतिनिधी – चाळीसगाव तालुक्यातील भोरस येथील बेलगंगा सहकारी साखर कारखाना अंबाजी ट्रेडींग कंपनीला देण्याबाबत आज जिल्हा बँकेकडून शिक्कामोर्तब करण्यात आले.
अंबाजी शुगर ट्रेडींगच्यावतीने जिल्हा बँकेकडे 10 कोटीचा भरणा देखिल करण्यात आला. बँकेच्या अध्यक्षा अ‍ॅड. रोहीणी खडसे यांनी विक्री प्रक्रिया अंबाजी ट्रेडींगच्या नावे अंतीम केली.
जिल्हा बँकेचे 71 कोटी घेणे असल्याकामी चाळीसगाव तालुक्यातील भोरस येथील बेलगंगा सहकारी साखर कारखांना सन 2002 पासून बँकेच्या ताब्यात होता. मध्यंतरीच्या काळात हा कारखाना भाडेतत्वावर देण्यात आला होता.

मात्र काही काळानंतर तो बंद पडला. त्यामुळे जिल्हा बँकेच्या विद्यमान संचालक मंडळाने हा कारखाना विक्री करण्याचा निर्णय घेतला होता.

त्यानुसार जिल्हा बँकेने केंद्र शासनाच्या एमएसटीसीई या एजन्सीमार्फत विक्री प्रक्रिया राबविली. याप्रक्रियेत चाळीसगाव येथील अंबाजी ट्रेडींग कंपनीची एकमेव निवीदा प्राप्त झाली होती.

या निवीदेपोटी 3 कोटी 92 लाखांची अनामत रक्कमही जमा करण्यात आली होती. अंबाजी ट्रेडींगची एकमेव निवीदा प्राप्त झाल्याने हा कारखाना 39 कोटी 22 लाख रूपयांना विक्री करण्यात आला.

दरम्यान या विक्री प्रक्रियेवर न्यायालयाने स्थगिती दिली होती. ही स्थगिती न्यायालयाने उठविल्यानंतर अंबाजी ट्रेडींग कंपनीच्यावतीने चित्रसेन पाटील यांनी आज जिल्हा बँकेकडे 5 कोटी 88 लाख 50 हजार रूपयांचा धनादेश देऊन बँकेकडे 25 टक्के रकमेचा भरणा केला.

जिल्हा बँकेच्या अध्यक्षा यांनी याबाबत अंबाजी ट्रेडींग कंपनीशी बेलगंगा साखर कारखाना विक्री व्यवहार अंतीम केल्याचे पत्र चित्रसेन पाटील यांना दिले.

यावेळी प्रविणभाई पटेल, दिलीप चौधरी, प्रेमचंद खिवसरा, रविंद्र केदारसिंग पाटील, विजय अग्रवाल, निशांत मोमाया, निलेश निकम, निलेश वाणी, अशोक ब्राम्हणकर, अजय शुक्ला, अजय माने, सतिष पाटील, डॉ. अभिजीत पाटील हे उपस्थित होते. लवकरच उर्वरीत रक्कम भरून हा कारखाना पुन्हा सुरू होण्याच्या आशा पल्लवीत झाल्या आहेत.

बेलगंगा साखर कारखाना भाडेतत्वावर देण्याचे खुप प्रयत्न केले गेले. पण कुणीही पुढाकार न घेतल्याने कारखाना विक्रीचा निर्णय झाला. शेतकर्‍यांच्या दृष्टीने अंबाजी ट्रेडींग कंपनीने बेलगंगा कारखाना घेण्यासाठी पुढाकार घेतला ही स्तुत्य बाब आहे. कारखाना सुरू होऊन भुमिपुत्रांना न्याय मिळावा हीच बँकेची अपेक्षा आहे.
– अ‍ॅड.रोहीणी खडसे-खेवलकर
अध्यक्षा, जिल्हा बँक,जळगाव

 

LEAVE A REPLY

*