शहरातील दोन मंदिरांमध्ये धाडसी चोरी

0

जळगाव । दि. 11 । प्रतिनिधी-शहरातील रामानंद नगर पोलिस स्टेशनच्या हद्दीमधील भुषण कॉलनीतील हनुमान मंदिर व मू.जे महाविद्यालयजवळील विठ्ठल रुख्मिणी मंदिर चोरटयांनी टार्गेट करून मंदिरातील मुर्त्यांवरील दागिने लांबवून नेल्याच्या घटना आज सकाळी उघडकीस आल्या.

हनुमान मंदिराच्या दानपेटीसह मुर्तीच्या पायातील चांदीचे कडे व विठ्ठल रुख्मिणी मंदिरातील चांदीच्या पादुका व मंदिरातील दोन्ही मुखवटे लांबवून हजारो रुपयांचा मुद्देमाल चोरून नेला आहे.

याबाबत परिसरातील नागरिकांकडून मिळालेली माहिती अशी की, भुषण कॉलनीत असलेल्या हनुमान मंदिर नेहमीप्रमाणे रात्री 9.30 वाजता वॉचमनने बंद केले.

त्यानंतर मध्यरात्री मंदिराच्या मागील बाजुने अज्ञात चोरटयांनी आत प्रवेश करून मंदिराची दानपेटी फोडून पेटीतील हजारो रुपयांची रक्कम व मुर्तीच्या पायातील चांदीचे कडे असा एकूण हजारो रुपयांचा मुद्देमाल अज्ञात चोरटयांनी लांबवून नेल्याची घटना आज सकाळी पुजार्‍याच्या लक्षात आली.

त्यांनी तात्काळ मंदिराच्या जवळील रहिवाशी चंद्रकांत बेंडाळे यांना माहिती कळविली. त्यानंतर बेंडाळे यांनी या घटनेबाबत रामानंद नगर पोलिस स्टेशनच्या अधिकार्‍यांना माहिती दिली. काही वेळानंतर घटनास्थळी गुन्हे शोध पथकातील अधिकार्‍यांनी पाहणी केली.

मंदिरात तिसर्‍यांदा चोरी
हनुमान मंदिरात यापूवी दोनदा चोरी झाली असून मंदिराची दानपेटी फोडण्यात आली होती. आज तिसर्‍यांदा दानपेटीसह मुर्तीच्या पायातील चांदीचे कडे चोरटयांनी लांबविले.

विठ्ठल रुख्मिणी मंदिरातील पादुका, मुखवटे लंपास
एम.जे कॉलेज जवळील नॉनटी डिग्री शॉपपासून जवळच असलेल्या विठ्ठल रुख्मिणी मंदिराचा मुख्य प्रवेशद्वाराचा कडीकोयंडा तोडून मंदिरातील पादुका व मुखवटे असा जवळपास 30 हजारांचा मुद्देमाल अज्ञात चोरटयांनी लांबविला.

विठ्ठल रुख्मिणी मंदिराच्य व्यवस्थेची जबाबदारी प्रा. वसंत जावळे पाहत असून मंदिरात संतोष कुळकर्णी हे पुजारी आहे. नेहमी त्यांचा मुलगा सकाळी पुजेचे काम पाहतो.

आज सकाळी संतोष कुळकर्णी यांच्या पत्नी संगीता कुळकर्णी हया मंदिरात आल्या असता, त्यांना मंदिरात चोरी झाल्याचे दिसून आले. त्यांनी तात्काळ याबाबत जावळे यांना माहिती दिली.मंदिररातील चांदीच्या पादुका व विठ्ठल रुखमाईचे मुकुट असा जवळपास 30 हजारांचा मुद्देमाल अज्ञात चोरटयांनी लांबवून नेला.दरम्यान या दोन्ही घटनाबाबत पोलिसात कुठेही नोंद नाही.

 

LEAVE A REPLY

*