पक्षांतर्गत बंदी कायद्याचा भंग केल्याने यावल पंचायत सभापती संध्या महाजन अपात्र : जिल्हादंडाधिकार्‍यांचा आदेश

0
जळगाव : कॉंग्रेसच्या पाठबळावर विजयी झालेल्या यावल येथील पंचायत समितीच्या सभापती सौ. संध्या किशोर महाजन यांना पक्षांतर्गत बंदी कायद्यान्वये महाराष्ट्र स्थानिक संस्था सदस्य अनर्हता अधिनियम अन्वये पंचायत सदस्यपदी अपात्र ठरवायचा आदेश जिल्हादंडाधिकारी तथा जिल्हाधिकारी किशोर राजे निंबाळकर यांनी आज दिला आहे.

त्यामुळे पंचायत समितीचे सदस्य व सभापती पद असे दोन पदे रिक्त झाली आहेत.

मार्च 2017 मध्ये यावल पंचायत समिती सभापती निवड झाली होती. तेव्हा भाजपने अपक्ष उमेदवार पल्लवी चौधरी यांना सभापतीपदाची उमेदवारी देवून पक्षाच्या पाच सदस्यांनी त्यांना मतदान करावे असा व्हीप भाजपाने बजावला होता.
संध्या किशोर महाजन या भाजपकडून निवडलेल्या सदस्य होत्या. त्यामुळे त्यांनाही भाजपने व्हीप बजावून पल्लवी चौधरींना मतदानाचा आदेश दिला होता. मात्र सभापती निवडणूकपूर्वी संध्या महाजन यांनी ऐनवेळी कॉंग्रेसचा पाठींबा घेत स्वतःच सभापती पद मिळविले.

संध्या महाजन यांनी भाजप गटनेता यांचा आदेश डावलल्याने दीपक पाटील यांनी त्यांच्या विरोधात जिल्हादंडाधिकारी यांच्याकडे पक्षांतर्गत बंदी कायद्यानुसार कारवाईची याचिका दाखल केली होती. त्यावर सुनावणी होवून निंबाळकर यांनी संध्या महाजन यांचे पंचायत समिती सदस्यत्वच रद्द ठरविल्याचा आदेश दिला आहे.

दरम्यान याबाबत संध्या महाजन यांच्याशी संपर्क करण्याचा प्रयत्न केला असता तो होवू शकला नाही.

LEAVE A REPLY

*