…तर शासकीय अनुदान बंद !

0
जळगाव । दि.10 । प्रतिनिधी-स्वच्छ भारत अभियानांतर्गत शहर हगणदारीमुक्त करण्यासाठी शासनास्तरावरुन योजना राबविण्यात येत आहे.
या योजनेंतर्गत नगरविकास विभागाचे उपसचिव सुधाकर बोबडे यांनी शहरात पाहणी केली. दरम्यान, हगणदारीमुक्त शहराबाबत नाराजी व्यक्त केली. दि.31 ऑगस्टपर्यंत शहर हगणदारीमुक्त न झाल्यास शासनाचे अनुदान बंद करण्याचा इशारा उपसचिव बोबडे यांनी महापालिकेला दिला.

स्वच्छ भारत अभियानांतर्गत पंतप्रधान, मुख्यमंत्री आणि राज्यभरातील जिल्हाधिकारी व आयुक्त यांची काल व्हीडीओ कॉन्फरंसिंग झाली.

यावेळी जळगाव शहरात समाधानकारक उपाययोजना नसल्याचे लक्षात आले. त्यामुळे नगरविकास विभागाचे उपसचिव सुधाकर बोबडे यांनी जळगाव शहरात येवून पाहणी केली.

तसेच मनपा अधिकार्‍यांची बैठक घेवून आढावा घेतला. उपसचिव बोबडे हे यापूर्वी देखील शहरात येवून अधिकार्‍यांना सूचना देवून गेलेत.

तसेच दि.15 ऑगस्टपर्यंत हगणदारीमुक्तबाबत सूचना देखील दिली होती. परंतु जैसे थे परिस्थिती आढळून आली आहे. त्यामुळे मनपा प्रशासनावर नाराजी व्यक्त करुन दि.31 ऑगस्टपर्यंत शहर हगणदारीमुक्त न झाल्यास महापालिकेला मिळणारे शासकीय अनुदान बंद करण्याचा इशारा देखील त्यांनी दिला आहेे.

अधिकार्‍यांकडून आढावा
जळगाव शहरात उघड्यावर शौच करणारे 58 ठिकाण होते. त्यापैकी 50 ठिकाण हगणदारीमुक्त करण्यात आले असले तरी आसोदा रोड, गोपाळपुरा, पिंप्राळा-हुडको, वाल्मिकनगर, मनियार वाडा यासह 8 ठिकाणी अद्यापही जैसे थे परिस्थिती आहे. त्यामुळे दि.31 ऑगस्टपर्यंत शहर पूर्णपणे हगणदारीमुक्त करण्याची सूचना उपसचिव सुधाकर बोबडे यांनी आढावा बैठकीत अधिकार्‍यांना दिली. यावेळी प्रभारी आयुक्त तथा जिल्हाधिकारी किशोर राजे निंबाळकर, उपायुक्त चंद्रकांत खोसे, सहाय्यक आयुक्त लक्ष्मीकांत कहार, आरोग्य अधिकारी डॉ.विकास पाटील, शहर अभियंता एस.एस.भोळे, विद्युत अभियंता एस.एस.पाटील उपस्थित होते.

 

LEAVE A REPLY

*