परराज्यातील भाजीपाल्याच्या वाहनांसह दुधाचे टँकर अडविले

0
कापडणे  / शेतकरी संपाच्या दुसर्‍या दिवशीही शेतकरी वर्गासह विविध संघटना आक्रमक झालेल्या दिसून आल्या. मुंबई-आग्रा महामार्गावरील सोनगीर टोलनाक्याजवळ शेतकरी संघटनेने आज (दि.2) आंदोलन केले. यात परराज्यातून येणारी भाजीपाला, भुसारमाल आदींच्या चार वाहनासह दुधाचे टँकर आंदोलनकर्त्यांनी परतवून लावले.
शेतकरी संपात आज (दि.2) शेतकरी संघटनेने सकाळी साडेनऊला मुंबई-आग्रा महामार्गावरील सोनगीर (ता. जि. धुळे) टोलनाक्याजवळ आंदोलन केले.
त्यावेळी गुजरातहून हैद्राबादकडे जाणारे दूधाचे टँकर संघटनेच्या आंदोलनकर्त्यांनी परतविले. तसेच मध्य प्रदेश व गुजरातकडून येणारी भूसार व भाजीपाल्याची चार वाहने देखील आंदोलकांनी परत पाठविली.
शेतकरी संपामुळे नंदूरबार, शहादा, शिंदखेडा व शिरपूरकडून शेतीमालाचे एकही वाहन धुळ्याकडे आले नाही. दरम्यान शेतकरी संपाच्या पार्श्वभूमीवर कालही (दि.1) कापडणे येथे रस्त्यावर दूध ओतणे, खासगी दूध संघाला कुलूप ठोकणे, रास्ता रोको आंदोलन आदी आंदोलन करण्यात आले होते.

आजच्या (दि.2) या आंदोलनात शेतकरी संघटनेचे जिल्हाध्यक्ष गुलाबसिंग रघुवंशी, माजी अध्यक्ष आत्माराम पाटील, शांतूभाई पटेल, रामकृष्ण पाटील, छगन पाटील, बंडू पाटील, साहेबराव वाघ, अरुण पाटील, जयवंत बोरसे, नारायण माळी, दिलीप पाटील आदींसह परीसरातील व जिल्हाभरातील शेतकरी उपस्थित होते.

या आंदोलनाच्या पार्श्वभूमीवर सदर टोल नाक्यावर पोलिस यंत्रणाही तैनात होती.

LEAVE A REPLY

*