ब्राम्हणीत ऊसतोडणी मजुरावर बिबट्याचा हल्ला

0

उंबरे (वार्ताहर) – राहुरी भागात बिबट्याचा वावर वाढतच असून ब्राम्हणी भागात ऊस तोडणी मजुरावर बिबट्याचा हल्ला झाल्याची घटना घडली आहे. शेतकर्‍यांनी बिबट्याची धास्ती घेतली, दरम्यान, वनखात्याच्या अधिकार्‍यांनी सुट्टीचे कारण दाखवून घटनास्थळी येण्यास नकार दिला. त्यामुळे शेतकर्‍यांनी संताप व्यक्त केला आहे.

राहुरी तालुक्यात गेल्या अनेक दिवसांपासून बिबट्याच्या समूहाने धुडगूस घातला आहे. रात्री-अपरात्री शेतकर्‍यांना दर्शन देणार्‍या बिबट्याकडून शेळ्या, मेंढ्या, कुत्रे, कालवड, कोंबड्या आदी पाळीव प्राण्यांचा फडशा पाडल्याच्या अनेक घटना परिसरात घडत असतानाच ब्राम्हणी भागात ऊस तोड सुरू असतानाच बिबट्याने ऊस तोडणी करणार्‍या मजुरावर हल्ला केल्याची घटना घडली आहे.

रविवारी ब्राम्हणी भागातील शेतकरी गणेश सुदाम भगत यांच्या गट नं. 320/1 मध्ये उसाची तोडणी सुरू होती. ऊस तोड करणारे मजूर दुपारच्या सत्रात ऊस तोडणीत व्यस्त असतानाच अचानकपणे उसातून बिबट्याचे बछडे बाहेर निघाले. बछड्याने समोर असलेले मजूर तुकाराम सोनवणे यांच्यावर हल्ला चढविला. यावेळी लगतच्या मजुरांनी आरडाओरडा करताच बिबट्याने पुन्हा उसातच धूम ठोकली.

तुकाराम सोनवणे यांच्या पायाला झालेली दुखापत पाहता गणेश भगत, संदीप देशमुख व मजुरांनी त्यांना नगर येथील रुग्णालयात उपचारासाठी हलविले. याप्रसंगी वनविभागाशी संपर्क साधला असता रविवारी सुट्टीचा दिवस असल्याचे कारण सांगत उद्या बघू असे उत्तर देऊन वनविभागाने घटनेच्या ठिकाणी दाखल होण्यास नकार दिला. याबाबत ब्राम्हणी भागातील शेतकर्‍यांनी वनविभागाच्या विरोधात संताप व्यक्त केला असून बिबट्याच्या हल्ल्यात जर शेतकरी जखमी झाला तर वनखात्यास जबाबदार धरले जाणार असल्याचे उपस्थित शेतकरी बोलत होते.

घटनेच्या दुसर्‍या दिवशीही बिबट्याच्या बछड्याच्या शोधात मादी बिबट्याने पुन्हा त्याच शेतात दर्शन दिले. ऊस तोडणी मजुरांना दिवसाढवळ्या बिबट्याचे दर्शन होत असल्याने तोडणी बंद करण्याचा निर्णय घेतल्याने शेतकरीही हतबल झाले आहेत. त्वरित उपाययोजना करणे गरजेचे असताना वनखात्याच्या निष्काळजीपणामुळे घटना घडल्यानंतर दुसर्‍या दिवशीही वनविभागाचे अधिकारी लोंढे व त्यांचे कर्मचारी घटनास्थळी दाखल झाले नसून बिबट्याला पकडण्यासाठी पिंजरा लावावा, अशी मागणी या परिसरातील शेतकर्‍यांनी केली आहे.

राहुरी विद्यापीठात बिबट्याचा राहुरी विद्यापीठात बिबट्याचा मुक्तपणे संचार  राहुरी  विद्यापीठ परिसरात बिबट्याचे बछडे मादीसह वावरत असल्याचे नागरिकांना आढळून आले आहे. त्यामुळे रहिवाशांमध्ये दहशत पसरली आहे. विद्यापीठातील अरविंद कॉलनी, टिचर होस्टेल, भूपाळी कॉलनी, पुजारा क्वार्टर, फार्म क्वार्टर, परिसरासह विद्यापीठातील भाजीपाला प्रकल्प परिसरात मध्यरात्री विद्यापीठाचे सुरक्षा अधिकारी शेटे हे गस्त घालत असताना त्यांना बिबट्याचे दर्शन झाले. त्यांच्यासमवेत असलेल्या अन्य सुरक्षा रक्षकांनी बिबट्यास दगडफेक करून हाकलून लावले. गेल्या आठ-दहा दिवसांपासून बिबट्याने परिसरात मुक्तपणे संचार सुरू केला आहे. त्यामुळे विद्यार्थी व महिलांनी सायंकाळी व पहाटेच्या वेळी फिरणे बंद केले आहे. येथे दाट झाडी असल्याने बिबट्यांना आश्रय घेण्यास जागा उपलब्ध झाली आहे. या बिबट्याचा बंदोबस्त करावा, अशी मागणी विद्यापीठ प्रशासनाने वनविभागाकडे पत्राद्वारे केली आहे.

LEAVE A REPLY

*