मनमाड, दि.29 (प्रतिनिधी) - मनमाड रेल्वेस्थानक परिसरात रेल्वे सुरक्षा बलाने धनराज विनोद झामरे याला विदेशी पिस्तूल व 35 जिवंत काडतुसांसह अटक केली. तो खरगोन येथून पिस्तूल आणि काडतूस घेऊन नाशिक येथे एका व्यक्तीला देण्यासाठी येत होता. कोर्टाने त्याला न्यायालयीन कोठडी दिली. तो नाशिकच्या क्लासिक असोसिएट या बांधकाम कंपनीत सुपरवायझर म्हणून काम करत होता. तिचे काम मध्य प्रदेशातील खरगोन येथे सुरू असल्याने त्याला पाठविण्यात आले होते. तिथे त्याची स्थानिक लोकांशी ओळख झाली. नाशिकला जात असल्याचे कळाल्यानंतर काही लोकांनी तुला 20 हजार रुपये देऊ तू पिस्तूल आणि काडतूस आम्ही सांगू त्या व्यक्तीस दे, असे सांगितले. 20 हजार रुपये मिळणार म्हणून लालसेपोटी धनराज पिस्तूल आणि काडतुसे घेऊन आला. रेल्वेस्थानकात जात असताना ब्रिजच्या जवळ स्कॅन मशीन लावलेली आहे तेथे सुरक्षा बलाने त्याला बॅग स्कॅन मशीनवर ठेवण्यास सांगितले. त्याने बॅग ठेवल्यानंतर त्यात पिस्तूल आणि काडतुसे दिसताच जवानांनी त्याला पकडून रेल्वे पोलिसांच्या स्वाधीन केले.