सांगली, दि. 27 - हिंदकेसरी, माजी खासदार मारुती माने (वय 72) यांचे आज सकाळी साडेदहाच्या सुमारास अल्पशा आजाराने निधन झाले. महिनाभरापासून येथील खासगी रुग्णालयात त्यांच्यावर उपाचार सुरू होते. रक्तातील प्लेटलेटस् कमी झाल्यामुळे त्यांना महिन्याभरापूर्वी मिरज येथील सिद्धीविनायक कॅन्सर हॉस्पिटलमध्ये दाखल करण्यात आले होते. त्यांच्या प्रकृतीत सारखा चढ-उतार होत होता. गेल्या चार दिवसांपासून त्यांची प्रकृती चिंताजनक बनली होती. आज सकाळी त्यांची प्राणज्योत मालवली. वयाच्या आठव्या वर्षी त्यांनी कुस्तीला सुरुवात केली. कुस्तीत प्राविण्य मिळवत आशियायी स्पर्धेत सुवर्ण व रौप्यपदक, राष्ट्रकुल स्पर्धेत रौप्यपदक आणि मानाचा हिंदकेसरी किताब मिळविला. तसेच त्यांनी ध्यानचंद पुरस्कारासह विविध पुरस्कार मिळवले. त्या शिवाय त्यांनी महाराष्ट्र कुस्तीगीर परिषदेचे अध्यक्ष, आदी पदांवर त्यांनी काम केले होते.