जळगाव,दि.27(प्रतिनिधी)- ज्ञानाची ओढ असली तरी वयाचे बंधनही गळून पडते असे म्हणतात. सध्याच्या पिढीतील शालेय विद्यार्थ्यांच्या प्रगतीचा वेग पाहता तर वयासह सर्वच मर्यादा पडू लागल्या असल्याचे दिसते. याचाच प्रत्यय जळगावातील सलोनी जितेंद्र लाठी या चिमुरडीने अवघ्या नवव्या वर्षी एमएससीआयटी ही संगणक ज्ञानाची परीक्षा उत्तीर्ण होत आणून दिला. सद्यस्थितीत टीव्हीवरील शो असो किंवा प्रत्यक्ष जीवन लहान मुलांच्या करामती सर्वांना तोंडात बोट घालण्यास भाग पाडतात. तसेच काही छोटे उस्ताद कठीण समजल्या जाणार्‍या स्पर्धा परीक्षांमध्येही कमी वयात यश संपादन करुन आपली चमक दाखवतात. अशीच महाराष्ट्र शासनाची संगणकीय ज्ञानाची अधिकृत परीक्षा असणारी एमएससीआयटी ही परीक्षा भल्याभल्यांना पास होणे कठीण वाटते. मात्र याच परीक्षेत सलोनीने 74 टक्के गुण मिळवून आपली चमक सिध्द केली आहे. सेंेट जोसेफ विद्यालयाची विद्यार्थीनी असणार्‍या सलोनीस सॉफ्टएड कॉम्प्यूटरच्या शितल भोलाणे, भुवनेश्वरी कुलकर्णी, योगेश कोळी यांचे मार्गदर्शन लाभले.