टोमॅटो @ 80; पावसाअभावी चढली लाली

0

अहमदनगर (प्रतिनिधी)- श्रावण महिन्यांत पालेभाज्यांना वाढलेली मागणी आणि त्या तुलनेत कमी झालेली आवक या तफावतीमुळे भाज्यांचे भाव तेजीत आहेत. नगरच्या बाजारात टोमॅटो व हिरवी मिरचीने ग्राहकांना झटका देण्यास सुरुवात केली आहे. किरकोळ बाजारात टोमॅटोचा भाव प्रतिकिलो 70 ते 80 रुपये असून मिरची 40 रुपये रुपये प्रतिकिलो विकली जात आहे. सिमला मिरची 60 रुपयांच्या पुढे गेली असून अन्य भाजीपाल्यांचे भाव 40 ते 50 रुपयांच्या जवळपास आहेत. पालेभाज्या स्वस्त असल्याने ग्राहकांना काहीसा दिलासा मिळत आहे.
मागील काही दिवसांपासून जिल्ह्यात सर्वदूर पावसाने चांगली हजेरी लावली. तसेच जिल्हाभर पेरण्यांची कामे सुरू असून शेतकरीवर्ग त्यातच गुंतला आहे. त्यामुळे भाज्यांच्या उत्पादनावर त्याचा परिणाम झाला आहे. या काळात भाज्यांची लागवड काही प्रमाणात कमी होते. तसेच पावसामुळे त्याची काढणीही करताना अडचणी येतात. जास्त पावसामुळे पालेभाज्यांवर विपरीत परिणाम होतो. त्यामुळे पालेभाज्या फार काळ टिकत नाहीत. त्यातच श्रावण महिना सुरू झाल्याने भाज्यांची मागणी मोठ्या प्रमाणात वाढली आहे. मागणी आणि आवक याचे समीकरण बिघडल्याने सध्या बहुतेक भाज्यांचे भाव वाढले आहेत. नगरच्या कृषी उत्पन्न बाजार समितीच्या मार्केट यार्डात सध्या भाज्यांची आवक सुमारे 20 टक्क्यांनी कमी होत आहे. त्यामुळे घाऊक बाजारात किरकोळ विक्रेत्यांना चढ्या भावाने भाज्यांची खरेदी करावी लागत आहे.
घाऊक बाजारातील भाव व किरकोळ बाजारातील भावांत मोठी तफावत असल्याचे दिसून येत आहे. काही भागांत किरकोळमध्ये टोमॅटोचे भाव प्रतिकिलो 70 ते 80 रुपये, तर हिरवी मिरचीची 60 ते 70 रुपयांनी विक्री सुरू आहे. घाऊक बाजारात हे भाव साधारणपणे प्रतिदहा किलोमागे अनुक्रमे 500 ते 650 आणि 400 ते 450 रुपये एवढा आहे. हिरवी मिरचीमध्ये खराब मालाचे प्रमाण अधिक असल्याने भाव अधिक असल्याचे किरकोळ विक्रेत्यांनी सांगितले. श्रावण महिना सुरू झाल्यानंतर दरवर्षी भाज्यांचे भाव वाढतात. तरीही यंदा मागील महिन्यांत पावसाने दिलेली ओढ आणि काही दिवसांपासून सुरू असलेल्या जोरदार पावसामुळे भाज्यांच्या उत्पादनावर परिणाम झाला आहे.

फळभाज्यांचे भाव तेजीत असले तरी ग्राहकांना पालेभाज्यांनी दिलासा दिला आहे. आवक चांगली होत असल्याने बहुतेक पालेभाज्यांचे भाव आवाक्यात आहेत. किरकोळ बाजारात कोथिंबीर, मेथीसह बहुतेक भाज्यांची विक्री जुडीमागे 5 ते 10 रुपयांनी होत आहे. पालकाची जुडी 5 ते 10 रुपये असून शेपुची भाजी 5 रुपयांत मिळत आहे. पावसाने उघडीप दिल्याने ही परिस्थिती महिनाभर कायम राहणार असल्याचे नगरमधील भाजी विक्रते देंवेंद्र भांबरकर यांनी सांगितले.

LEAVE A REPLY

*